Ռուսական «Ռոսիա 24» հեռուստաընկերությունը ռեպորտաժ է պատրաստել Հայաստանի ՍԴ նախագահ Հրայր Թովմասյանի շուրջ ստեղծված իրավիճակի և նրա նկատմամբ քրեական գործ հարուցելու վերաբերյալ:
Նշվում է, որ Թովմասյանի նկատմամբ հարուցված քրեական գործը կապված է նրա կողմից պաշտոնական դիրքի հավանական չարաշահման հետ այն ժամանակահատվածում, երբ վերջինս զբաղեցնում էր արդարադատության նախարարի պաշտոնը:
Հեռուստաալիքը մեկնաբանության համար դիմել է «Իրավական ուղի» ՀԿ համահիմնադիր Ռուբեն Մելիքյանին, որը նշել է, որ Հրայր Թովմասյանի նկատմամբ ՀՀ իշխանությունների կողմից քաղաքական հետապնդում է իրականացվում:
«Քոչարյանին ուղղված մեղադրանքների օրինականությունն անվերապահորեն ճանաչելու փոխարեն, ինչպես կցանկանար ներկայիս քաղաքական վերնախավը, Սահմանադրական դատարանը դիմել է ՄԻԵԴ-ին և Վենետիկի հանձնաժողովին՝ խորհրդակցական կարծիքի համար: Հրայր Թովմասյանի հարցը քաղաքական է: Դա ճանաչում են ինչպես նրա կողմնակիցները, այնպես էլ նրանք, ովքեր փորձում են հեռացնել նրան»,- ասվում է ռեպորտաժում:
Ռեպորտաժում նշվում է նաև, որ հարցաքննման են կանչվել Թովմասյանի տարեց հայրը, որն առողջական խնդիրներ ունի, ինչպես նաև դուստրերը: «Ռոսիա 24»-ի լրագրողը նշում է, որ Հրայր Թովմասյանին ձերբակալելու ոչ մի իրավական հիմք չկա, քանի որ նա ի պաշտոնե անձեռնմխելի է:
