Ամերիկացի Սալվատորե Անելոյին մեղադրանք է ներկայացվել Freedom of the Seas կրուիզային նավի 11-րդ տախտակամածից ծովն ընկած իր մեկուկես տարեկան թոռնուհուն՝ Քլոե Վիգանդին, անզգուշությամբ մահ պատճառելու համար: Այդ մասին հայտնում է Daily Mail-ը:
Տղամարդուն ձերբակալել են, բայց հետագայում ազատ են արձակել 80 հազար դոլար գրավի դիմաց: Նա դատարանի առաջ կկանգնի նոյեմբերի 20-ին:
Տղամարդը մեղադրվում է երեխային խաղային գոտու բաց պատուհանի մոտ տանելու համար, որտեղից և ընկել է Քլոեն: Երեխան ընկնելով բետոնե հատակին մահացել է: Նավի սեփականատեր Royal Caribbean ընկերության ներկայացուցիչները հայտարարել են, որ պատուհանը բաց է եղել տարածքի օդափոխության նպատակով:
Աղջկա ծնողները՝ Ալան և Քիմբերլի Վիգանդները հայտարարել են, որ Անելոյին մեղավոր չեն համարում իրենց դստեր մահվան համար: Նրանց խոսքերով, տղամարդը ծանր է տանում թոռնուհու մահը:
«Նա ցնցված է: Նա մի քանի անգամ մեզ ասել է, որ ենթադրել է, որ այնտեղ ապակի է եղել: Նա անդադար արտասվում էր: Սեմը երբեք չի վտանգել մեր երեխաների կյանքը»,- ասել է աղջկա մայրը: «Նա շատ ծանր ապրումների մեջ է: Անհնար է նրան նայել առանց արցունքների, Քլոեն նրա լավագույն ընկերուհին էր»,- հավելել է հայրը:
Ընտանիքը մտադիր է դատի տալ Royal Caribbean-ին:
Հուլիսին հայտնի է դարձել Սալվատորե Անելոյի փաստաբան Մայքլ Վինկլեմանի վարկածը: Ընտանեկան փաստաբանի խոսքերով, պապը թոռնուհուն նստեցրել է խաղասենյակի պատուհանի գոգին, քանի որ երեխան ցանկացել է թակել պատուհանը:
