Երևանում հոկտեմբերի 28-ին բացվեց ամերիկյան «Զայլինքս» (Xilinx) տեխնոլոգիական ընկերության «Զայլինքս Արմենիա» գիտահետազոտական կենտրոնը:
Բացման արարողությանը ներկա էին ՀՀ վարչապետ Նիկոլ Փաշինյանը, ՀՀ բարձր տեխնոլոգիական արդյունաբերության նախարար Հակոբ Արշակյանը, ինչպես նաև «Զայլինքս» տեխնոլոգիական ընկերության գործադիր տնօրեն Վիկտոր Փենգը:
Ընկերությունը հայտնի է նրանով, որ ստեղծել է FPGA (Field-Programmable Gate Array) միկրոսխեմաները, որի ծրագրավորման օգնությամբ կարելի է փոխել ազդանշանային ուղին տրամաբանական տարրերի միջև, ինչը ավելի է հեշտացնում են ոչ բարդ գործողությունների համար նախատեսված սարքերի արտադրանքը:
Վիկտոր Փենգը հայտնեց, որ Հայաստանում ընկերության ներկայացուցչության բացումը շատ հետաքրքիր փորձ կլինի:
«Կարծում եմ, որ Հայաստանը նույնպես նորարարության ոլորտում բավականին մեծ ներուժ ունի, այդ իսկ պատճառով այստեղ մեր կենտրոնի բացումը նպատակ ունի զարգացնելու այդ հնարավորությունը»,- ասաց Փենգը:
«Զայլինքս» տեխնոլոգիական ընկերության գործադիր տնօրենը հայտնեց, որ այս պահին կենտրոնը ունի 15 աշխատակից, իսկ հետագայում նախատեսում են ունենալ 50 աշխատակից:
«Մենք իրականացնելու ենք երկարաժամկետ ծրագիր և Հայաստանում մեծ ակնկալիքներ ունենք: Ընկերությունը համագործակցելու է տարբեր համալսարանների և համայնքների հետ»,- ընդգծեց Փենգը:
Բարձր տեխնոլոգիական արդյունաբերության նախարար Հակոբ Արշակյանը նշեց, որ Հայաստանը նպատակ ունի դառնալ տեխնոլոգիական կենտրոն, որտեղ ստեղծագործող մարդիկ ցանկություն կունենան աշխատել և ապրել Հայաստանում:
