Ադրբեջանական APA լրատվական գործակալության փոխանցմամբ՝ Ադրբեջանի ԱԳՆ մամլո քարտուղար Էլխան Պոլուխովը հայտարարել է, որ «լիովին անհեթեթ ու անտրամաբանական» է Հայաստանի նախագահի այն կարծիքը, թե Լեռնային Ղարաբաղին տրվելու է միջանկյալ կարգավիճակ, որը ճանաչվելու է միջազգային հանրության կողմից.
«Հայաստանի նախագահը «չի հասկանում», թե ինչ է խոսում։ Միջազգային հանրության կողմից ճանաչված միջանկյալ կարգավիճակը «չի համապատասխանում» միջազգային հարաաբերությունների տերմինաբանությանը։ Եթե ապագայում Լեռնային Ղարաբաղին տրվի որևէ կարգավիճակ, ապա դա «կլինի միայն» միջազգային հանրության կողմից ճանաչված Ադրբեջանի Հանրապետության սահմանների շրջանակներում։
Հնարավոր է, որ Հայաստանի նախագահն այդպիսի հայտարարություն է արել ներքաղաքական զարգացումների պատճառով՝ իշխանություններից հայ հասարակության դժգոհությունը շեղելու համար։ Այդպիսի իրավիճակում Ադրբեջանը հարմար թիրախ է»։
Պոլուխովին պետք է հիշեցնել, որ Լեռնային Ղարաբաղին միջանկյալ կարգավիճակ տրամադրելու մասին արտահայտվել են նաև Ադրբեջանի նախագահ Իլհամ Ալիևը և Ադրբեջանի նախագահի աշխատակազմի հասարակական-քաղաքական հարցերի վարչության պետ Ալի Հասանովը, որոնք ստացվում է՝ նույնպես «չեն հասկանում», թե ինչ են խոսում։