Նախկին նախագահ Ռոբերտ Քոչարյանը սահմանադրական բարեփոխումների հայեցակարգի և Սերժ Սարգսյանի հայտարարությունների մասին իր տեսակետը հաստատ հայտնելու է: Այդ մասին այսօր «Առաջին լրատվական»-ի հետ հեռախոսազրույցում ասաց Ռ.Քոչարյանի գրասենյակի ղեկավար Վիկտոր Սողոմոնյանը:
Հիշեցնենք, որ երեկ հրապարակվել է սահմանադրական բարեփոխումների հայեցակարգը և արդեն հասցրել է դառնալ բուռն քննարկումների առարկա: Այդ առիթով երեկ նախագահին կից սահմանադրական բարեփոխումների հանձնաժողովի հետ հանդիպման ժամանակ Սերժ Սարգսյանը մի քանի ուշագրավ հայտարարություն էր արել: Նախ նա այսպիսի հայտարարություն էր արել. «Քննարկումների փուլը սկսելուց առաջ պաշտոնապես հայտարարում եմ, որ ես՝ Սերժ Սարգսյանս, այլևս երբեք չեմ առաջադրվելու Հայաստանի Հանրապետության նախագահի պաշտոնի համար: Վստահ եմ անգամ, որ մեկ մարդը երկու անգամից ավելի իր կյանքում չպետք է հավակնի ընդհանրապես երկրի կառավարման ղեկին Հայաստանում»:
Քաղաքական շրջանակներում կարծիքներ են հնչում, թե Ս.Սարգսյանն այս հայտարարությունը միայն իր մասին չի հնչեցրել, նա դա արել է նաև Ռ.Քոչարյանի համար: Եվ այսպիսով նա Ռ.Քոչարյանին հասկանալ է տալիս, որ նախկին նախագահն էլ չպետք է մտածի վերադառնալու մասին:
Իր այդ հայտարարությամբ Ս.Սարգսյանը նաև հասկանալ է տվել, որ երկու անգամից ավելի նախագահ չդառնալու սկզբունքը, որպես պարտադիր նորմ, պետք է ամրագրվի նոր Սահմանադրության մեջ: Եվ Հայաստանի ոչ մի նախագահ չպետք է երրորդ անգամ նախագահ դառնա:
Գործող Սահմանադրությամբ նախագահը չի կարող իրար հետևից երեք անգամ զբաղեցնել երկրի ղեկավարի պաշտոնը, բայց երկու ժամկետ պաշտոնավարելուց հետո կարող է ընդմիջել և նորից առաջադրվել: Այնպես, ինչպես Ռուսաստանում արեց Վլադիմիր Պուտինը:
Եվ ահա, կարծիք կա, որ Ռ.Քոչարյանը ցանկանում է կրկին, ամենայն հավանականությամբ, 2018թ. նախագահական ընտրություններին առաջադրվել: Եթե, իհարկե, անկանխատեսելի զարգացումներ չլինեն, ու արտահերթ ընտրություններ տեղի չունենան:
Իսկ երեկ նախագահականում Ս.Սարգսյանի հետ հանդիպումից հետո «Բարգավաճ Հայաստան» կուսակցությունը հաղորդագրություն էր տարածել, թե «Գագիկ Ծառուկյանը ներկայացրել է ԲՀԿ դիրքորոշումը, որ կուսակցությունը սկզբունքորեն դեմ է սահմանադրական փոփոխությունների փաթեթին և դրա քննարկմանը հատկապես այս ժամանակահատվածում»:
Այսպիսով՝ կարծիք կա, թե Ս.Սարգսյանի՝ «մեկ մարդը երկու անգամից ավելի իր կյանքում չպետք է հավակնի ընդհանրապես երկրի կառավարման ղեկին Հայաստանում» հայտարարությանն ու այն սահմանադրական նորմ դառնալու հեռանկարին իրականում դեմ է Ռ.Քոչարյանը: Եվ դա արտահայտում է ԲՀԿ-ի միջոցով: Այժմ Ռ.Քոչարյանը ուսումնասիրում է սահմանադրական բարեփոխումների հայեցակարգը: Վ.Սողոմոնյանը մեզ հետ զրույցում նաև ասաց, թե ամբողջ փաթեթը՝ և՛ Ս.Սարգսյանի հայտարարությունը, և՛ սահմանադրական փոփոխությունների փաթեթը, երեկ երեկոյան փոխանցել է նախկին նախագահին, բայց դեռ արձագանք չի ստացել:
«Ես կարծում եմ, որ կունենանք: Չեմ կարող ասել՝ երբ, ժամկետ չեմ կարող նշել, բայց կարծում եմ, որ կունենանք: Բացի դրանից՝ եթե հիշում եք, ես մի քանի օր առաջ ասել էի, որ սահմանադրական փոփոխությունների վերաբերյալ նախագահը պատրաստվում է իր տեսակետները հայտնել: Կարծում եմ, որ այդ ամբողջը միաժամանակ կլինի: Բայց նորից եմ ասում, որ ժամկետների վերաբերյալ ոչինչ ասել չեմ կարող: Դա արագ կլինի, մոտակա օրերին կլինի, թե երբ կլինի՝ դժվարանում եմ ասել: Բայց առաջիկայում հաստատ կլինի»,- եզրափակեց Վ.Սողոմոնյանը: