Կոդավորման ամենահայտնի տեխնոլոգիաներից մեկում օրերս հայտնաբերված խոցելիությունը, որը ստացել է Heartbleed անվանումը, ճանաչվել է ամենավտանգավորը համացանցի գոյության ողջ պատմության մեջ: Շատ փորձագետներ ենթադրում են, որ OpenSSL-ի մշակողը միումնավոր է իր արտադրանքում թողել «անցքը», սակայն գերմանացի ծրագրավորողը հերքում է բոլոր մեղադրանքները: Այս մասին հայտնում է The Sidney Morning Herald-ը:
Heartbleed-ը վտանգավոր է նախևառաջ նրանով, որ առնչվում է համացանցում գտնվող գրեթե բոլոր մարդկանց: Գրեթե յուրաքանչյուր օգտատիրոջ՝ ծառայությունների ու սոցցանցերի գաղտնաբառերը, բանկային տվյալներն ու այլ տեղեկություններ կարող են գողացվել:
OpenSSL-ից է օգտվում սերվերների մոտ 2/3-ը: Որոշ փորձագետներ նույնիսկ մարդկանց խորհուրդ են տվել առաջիկա օրերին չօգտվել համացանցից՝ մինչև խոցելիությունը վերացվի:
Գերմանացի ծրագրավորողը, ով պատասխանատու է այդ «տեղեկատվական աղետի» համար, հերքում է իր հասցեին հնչեցրած բոլոր մեղադրանքները: Կարծիք կա, որ այն միտումնավոր է արվել՝ թույլ տալու համար, որ հատուկ ծառայությունները վերահսկեն համացանցը: Ծրագրավորողի խոսքով՝ դա պարզապես ծրագրային սխալ է եղել նոր գործառույթում:
