Հոկտեմբերի 27-ի ահաբեկչությունից անցել է 20 տարի, սակայն մենք դեռ անորոշության մեջ ենք։
Ինչո՞ւ Հոկտեմբերի 27-ը հնարավոր դարձավ, և ովքե՞ր են Հայաստանում և Հայաստանի սահմաններից դուրս շահագրգռված, որ Հոկտեմբերի 27-ը չբացահայտվի․ «Առաջին լրատվական»-ի հարցին Գլոբալիզացիայի և տարածաշրջանային համագործակցության վերլուծական կենտրոնի նախագահ Ստեփան Գրիգորյանը պատասխանեց․ «Նոր իշխանությունների ժամանակ ակնհայտ է, որ Հոկտեմբերի 27-ի խնդիրը պետք է բարձրանա։ Նիկոլ Փաշինյանը ճիշտ արեց, որ առաջ քաշեց Մարտի 1-ը, դա շատ կարևոր էր, բայց անխուսափելի էր, որ Հոկտեմբերի 27-ը պետք է առաջ գար։ Գիտեք, քանի որ այդ բոլոր ոճրագործությունները կատարվել են վերջին 20 տարվա ընթացքում՝ Հանրապետական կուսակցության իշխանության օրոք, երկու դեպքում էլ անձերը գրեթե կրկնվում են։ Եթե նկատել եք՝ շատ մարդիկ այդ ոճրագործություններից հետո ստացել են պաշտոններ, առաջ են գնացել, և դա էր պատճառը, որ Հոկտեմբերի 27-ի առաջ քաշելն անխուսափելի էր»։
Հոկտեմբերի 27-ով գլխատվեց մեր պետականությունը, որով հիմք դրվեց հետագա ոճրագործություններին։ Ըստ ձեզ, իսկ գործի բացահայտումը մեզ ի՞նչ կտա․ «Առաջին լրատվական»-ի հարցին Ստեփան Գրիգորյանը պատասխանեց․ «Ես չեմ կարող ասել, որ հեշտ կլինի բացահայտել, բայց, այնուամենայնիվ, բացահայտելը շատ կարևոր է։ Գիտեք ինչու, որ հասկանանք՝ դրսի ուժերն ակտիվ մասնակցե՞լ են, թե՞ ոչ։ Ճիշտ է, կան ենթադրություններ՝ բավական մոտ իրականությանը, բայց, այնուամենայնիվ, մի բան է մեր ենթադրությունները, մի այլ բան է իրականությունը։ Այդ տեսակետից ճիշտ կլինի բացահայտել արտաքին հետքերը, դա առաջին հերթին։ Երկրորդը՝ մենք պետք է հասկանանք, թե ներսում ով ով է։ Այսօր Ազգային ժողովում կա մի օրենսդրական նախաձեռնություն, որով պետք է բացահայտվեն բոլոր հանքերի իրական սեփականատերերը։ Հավաստիացնում եմ ձեզ՝ երբ բացահայտվեն հանքերի սեփականատերերը, մեզ համար շատ բան կբացահայտվի»։
Մանրամասները՝ տեսանյութում։
