Ուղիղ մեկ շաբաթ առաջ՝ ապրիլի 3-ին, Տիգրան Սարգսյանը հրաժարականի դիմում էր ներկայացրել Հայաստանի նախագահ Սերժ Սարգսյանին: Սերժ Սարգսյանն ընդունել էր այն, և մոտ մեկ շաբաթ շարունակ քննարկվում է հնարավոր վարչապետի թեկնածությունը: Փորձագետները վարչապետի հրաժարականի տարբեր պատճառներ են վկայաբերում՝ արտաքին, ներքին, և, բնականաբար, բոլոր կարծիքներն էլ ունեն գոյության իրավունք:
Երեկ հետաքրքրական զարգացումներ են տեղի ունեցել: Ոչ իշխանական ուժերը՝ ՀՅԴ-ն և ԲՀԿ-ն, Սերժ Սարգսյանի մոտ քննարկումների էին մասնակցում, և, ամենայն հավանականությամբ, նոր ձևավորվելիք կառավարության կազմում իրենց մասնակցության հնարավորությունն էր քննարկվում, նաև նոր վարչապետի անձը պետք է քննարկվեր, համաձայնեցվեր քաղաքական այս ուժերի հետ:
«Առաջին լրատվական»–ի Realpolitik հաղորդաշարի հյուրն է Գլոբալիզացիայի և տարածաշրջանային համագործակցության վերլուծական կենտրոնի խորհրդի նախագահ Ստեփան Գրիգորյանը:
– Պարոն Գրիգորյան, ինչպե՞ս եք գնահատում մեկ շաբաթ առաջ սկսված գործընթացների տրամաբանությունը: Որքանո՞վ կարող էր հատկապես քառյակի՝ ոչ իշխանական 4 ուժերի ներքին պահանջը այդքան ուժգին լինել, որ ստիպեր Սերժ Սարգսյանին գնալ այսպիսի ռադիկալ որոշման՝ փոխելու իր թիմի ամենակարևոր սյուներից մեկին՝ վարչապետին, և որքանո՞վ կարող էր արտաքին ազդեցությունն այնքան ուժգին լինել, որ Սերժ Սարգսյանին ստիպեր այսպիսի որոշում կայացնել:
– Ճիշտն ասած՝ դժվարանում եմ ասել: Համոզված չեմ, որ Հայաստանի ներքին քաղաքականության հետաքրքրությունների մակարդակն այնքան բարձր է, որ հետաքրքրի արտաքին գործոններին, գլխավոր խաղացողներին, և չեմ կարծում, որ Հայաստանն այնքան մեծ է, որ բոլորն ուշադիր հետևում են, թե դրա ներսում ինչ է կատարվում: Միգուցե ինչ-որ չափով Ռուսաստանին հետաքրքիր է, բայց, այնուամենայնիվ, քանի որ նախկին կառավարությունն էլ հայտնեց, որ գնում է և համաձայն է գնալ Մաքսային միություն, ես չեմ կարծում, որ վարչապետի փոփոխությունը կապված է արտաքին գործոնների հետ: Տարբեր գործոններ կարող են ազդել, բայց դա, ըստ իս, արտաքին գործոնը չէ: Ուրիշ բան, եթե Տիգրան Սարգսյանը հետևողական լիներ ու չհամաձայներ Մաքսային միություն գնալ, սեպտեմբերի 3-ի որոշումից հետո դիմադրեր, այդ դեպքում ես այստեղ արտաքին գործոնը կմիացնեի:
