Խորհրդարանում հոկտեմբերի 18-ին լսումներ են անցկացվել «Կուսակցությունների մասին օրենքի» փոփոխությունների շուրջ։ «Իմ քայլը» խմբակցությունը դեռևս մի քանի շաբաթ առաջ ազդարարել էր այդ օրենքի փոփոխությունների մշակման աշխատանքների մեկնարկի մասին:
«Կուսակցությունները նոր են առաջանալու այն Հայաստանում, որը կապահովի արժանապատիվ կյանքը մեր պետությունում, նոր պրոցես է սկսվում, նոր ուժեր են եկել: Հին ուժերը, նկատի չունեմ միայն հանրապետականներին, պետք է գիտակցեն, որ իրենց կերպով ապրելու և գործելու ժամանակն անցել է, բոլորը պետք է փոխվեն»,- այս մասին «Առաջին լրատվական»-ի հետ զրույցում ասաց ԳՄ և ԱԺ նախկին պատգամավոր Վիգեն Խաչատրյանը: Նրա խոսքով՝ պետք է բացառվի որևէ կուսակցության քողարկված ֆինանսավորումը արտերկրից. «Մենք լուրջ պետությունների շահերի բախման կետում ենք գտնվում և երբ խոսում ենք ինքնիշխանության մասին, պետք է վստահ լինենք, որ մեր քաղաքական ուժերը ինքնիշխան են»:
Վիգեն Խաչատրյանի կարծիքով՝ եթե ուզում ենք ունենալ հասարակությանը սպասարկող և երկրի զարգացմանը նպաստող քաղաքական ուժ, պետք է արգելվի կուսակցությունների բարեգործությամբ զբաղվելը և սեփական հեռուստատեսություն ունենալը. «Դա կուսակցությանը շեղում է իր բուն նպատակից… Սփյուռքում հասկանալի է, բայց Հայաստանում որևէ կուսակցություն չպետք է ունենա սեփական բարեգործական հիմնադրամ, սեփական մշակութային կառույց կամ լրատվամիջոց»:
Կուսակցությունների օրենքը որպեսզի աշխատող լինի, ըստ նախկին պատգամավորի, պետք է հաշվի առնել միջազգային փորձը, բայց պետք է հաշվի առնել նաև մեր անցյալը և առանձնահատկությունները. միջազգային չափանիշները պետք է տեղայնացնել՝ ելնելով մեր առաջնային խնդիրներից. «Իհարկե դրան պետք է համահունչ լինի նաև Ընտրական օրենսգիրքը: Կուսակցությունների մասին օրենքը պետք է բխի Սահմանադրությունից, բայց մեր Սահմանադրությունը լեգիտիմ չէ… Մեզ պետք է լեգիտիմ Սահմանադրություն, շատ բան չպետք է փոխել»:
«Ցանկալի է, որ խորհրդարանական լսումները լինեն առավելագույնս թափանցիկ, քանի որ այս բոլորն արվում է քաղաքացու իրավունքները պաշտպանելու համար: մեզ պետք է, որ անհատը չհակադրվի հասարակությանը և հասարակությունը չհակադրվի պետությանը, այլ համարի իր սեփականությունը և նպաստի պետության զարգացմանը»,- նշեց մեր զրուցակիցը՝ հավելելով, որ այս առումով կուսակցություններն անփոխարինելի դեր ունեն:
Մանրամասն՝ տեսանյութում:
