Ճարտարապետները մտադիր են դիմել մշակույթի նախարարություն՝ Զվարթնոց օդանավակայանի շենքը հատուկ պահպանվող տարածք ճանաչելու խնդրով: Ապրիլի 10-ին լրագրողների հետ հանդիպմանը Ճարտարապետների միության նախագահ Մկրտիչ Մինասյանը նշեց, որ ցանկանում են ցանկում ընդգրկել նաև բոլոր այն շենքերը, որոնք վտանգի տակ են, որոնցով Երևանը ներկայանալի և ճանաչելի է: Դրանք 50-60-ականներին կառուցված շենքերից են, որոնք արժեքավոր են:
«Օդանավակայանի կլոր շենքի վերաբերյալ քննարկումներ պիտի լինեն, շենքը նախքան այդ չպիտի քանդվի. կա նման պայմանավորվածություն: Մի խնդիր կա, եթե, ասենք, Ամառային կինոթատրոնը հատուկ պահպանվող տարածքների ցանկում է լինում, հետո հանում են և չեն կարողանում վերադարձնել. քանդելը շատ հեշտ բան է, իսկ երբ ուզում ես վերականգնել ու նորից տեղը բերել, տասնապատիկ մեծ ջանքեր են պահանջվում:
Մեր օրենքները կատարյալ են, այնքան են, որ կարողանանք դրանց միջավայրում լավ ապրել, բայց գործադիր իշխանությունները կարծեք օրենքին հակառակ են շարժվում»,- ասաց նա՝ հավելելով՝ կյանքը ցույց է տվել, որ երբ կարողանում են երկխոսել, միշտ էլ արդյունքն ավելի դրական է լինում, քան երբ փորձում են ջարդել, փշրել:
Ճարտարապետները պնդել են՝ հարցը պիտի քննվի՝ ելակետ ընդունելով ոչ թե տեղ ազատելու, նոր օդանավակայանին տեղ տալու, հինը քանդելու սկզբունքը, այլ այն, որ շենքը պահպանվի և նրան նոր գործառույթ հաղորդվի: Մինասյանի խոսքով՝ հնարավոր է՝ կան որոշ անհարմարություններ, բայց միշտ էլ աշխարհում փորձում են պահել այն շենքեր, որոնք քաղաքի համար կարևորություն են ունեցել, իսկ Զվարթնոցը մեր ճարտարապետական գործընթացի լավագույն էջերից է: «Եթե մենք հանում ենք Երիտասարդական պալատը, Զվարթնոցի կլոր շենքը, Ամառային կինոթատրոնը, դուրս է գալիս, որ հայ ճարտարապետությունն այդ շրջանում ոչ մի կառույցով չի ներկայացել՝ այն դեպքում, երբ դրանք եղել են Խորհրդային ժամանակաշրջանի ամենակարևոր կառույցներից:
Մի տեսակ տխուր է, երբ մարդ ջնջում է էջն իր պատմությունից և հետագայում, երբ արդեն կցանկանաս ներկայանալ միջազգային ճարտարապետական հանրությանը՝ գիտեք, ես այսինչ գործն արել եմ և դա պահպանված չէ, կրկնակի վատ վիճակում է հայտնվում»,- ասաց նա:
ԱԳ նախարարության շենքը հյուրանոց դարձնելը, ըստ Մինասյանի, հավանական չէ. այն հյուրանոցի համար պիտանի չէ, եթե տարածք ունենար, լիներ հյուրանոցային շենք, եթե կարողանային այնտեղ հանդիպման դահլիճներ, սրահներ անեին, որտեղ կարիք չէր լինի արտաքին փոփոխությունների, գուցե հնարավոր լիներ հյուրանոց կառուցել: Միության նախագահը, սակայն, կարծում է. եթե այդտեղ թանգարան լինի, բոլորը կշահեն:
Հին Երևան նախագծին անդրադառնալով՝ Մինասյանը նախ հորդորեց չնեղանալ, ապա նշեց. «Եթե մենք վերստեղծում ենք մի բան, որ չի կարողանալու գրավել, եթե դրանք միջավայրից պոկված հուշարձաններ են, ուղղակի դրա անունով արված կառույցներ են, դրանք հուշարձան չեն, նոր բաներ են»,- ասաց նա՝ նշելով, որ կա մի հատակագիծ, որին պետք է անշեղորեն հետևել, որքան էլ այն հնացած լինի, դա Թամանյանի նախագիծն է:
Լուսանկարը` PanARMENIAN Photo-ի
