«Այսպիսի թույլ վիճակում երբևիցե Հայաստանի իշխանությունը չի եղել»,- այսօր լրագրողների հետ հանդիպմանը նման տեսակետ հայտնեց «Ղարաբաղ» կոմիտեի անդամ Աշոտ Մանուչարյանը:
Նրա խոսքով՝ կառավարման համակարգը պետք է շատ ամուր ինտեգրված լինի և ամբողջականացնի ողջ հայությանը, հակառակ դեպքում կործանարար գործընթացները, որ տեղի են ունենում, մեզանից շատ ու շատ բան են տանում. «Քաղաքական ամբողջ դաշտը, ներառյալ ոչիշխանականը, նույն փիլիսոփայության մեջ են: Երեկվա ընդդիմադիրները հո չդադարեցի՞ն կողոպտիչ կաշառակեր լինել»,- ասաց Մանուչարյանը:
Նա ավելացրեց, որ կառավարության մաս կազմելու փոխարեն՝ լավ կլիներ, որ ԲՀԿ-ն, ՀՅԴ-ն պատժեին կողոպտիչներին:
Մանուչարյանի խոսքով՝ մեկ ամսից Հայաստանը դառնում է Մաքսային միության անդամ, ապագայում նաև՝ Եվրասիական միության, իսկ այդ համակարգի լիդեր պետությունը բախման մեջ է Միացյալ Նահանգների հետ. «Կողոպուտի համաշխարհային համակարգը՝ Միացյալ Նահանգները, հակամարտության մեջ է Ռուսաստանի հետ, որը հիմա ձգտում է ազատվել օլիգարխիայից: Նույն բանը Ռուսաստանը թելադրելու է Մաքսային միության մյուս անդամներին»:
Հետևաբար, բանախոսի պնդմամբ, բախում է լինելու Մաքսային միության լիդերների և Հայաստանի կառավարող շրջանակի միջև:
«Առաջին լրատվական»-ը Աշոտ Մանուչարյանից հետաքրքրվեց, թե ի՞նչ կարծիք ունի ԲՀԿ առաջնորդ Գագիկ Ծառուկյանի՝ կոնսոլիդացիայի վերաբերյալ առաջարկի ու քննարկումների մասին: Մեր այն դիտարկմանը, թե եթե, օրինակ, ազատամարտիկներին հրավեր լինի, կհամաձայնի՞, թե՞ ոչ, նա պատասխանեց. «Այդ մարդու համար երկու ճանապարհ են ասում. մի պատմություն՝ կապված Իվանիշվիլու հետ, որն ինձ համար անընդունելի է, և Սավա Մոռոզովի կարգավիճակը. նա ֆինանսավորում էր ռուսական հեղափոխությունը, որի շնորհիվ աշքատներ և հարուստներ համակարգը վերացվեց: Ինձ համար աընդունելի է հարուստ մարդ հասկացությունը այն դեպքում, երբ աշխարհում կան սովածներ: Հարուստ մարդն ապտակ է հանրությանը:
Լուսանկարը՝ Photolure-ի
