Հոկտեմբերի 15-ին ՀՀ վարչական դատարանը բավարարել է «Լիդիան Արմենիայի» հայցը և անվավեր է ճանաչել ՀՀ բնապահպանության և ընդերքի տեսչական մարմնի՝ «Որոշակի գործողություններ կատարելուց ձեռնպահ մնալուն պարտավորեցնելու մասին» 2018թ. օգոստոսի 27-ի թիվ 30-Ա որոշումը։
Ինչպիսի՞ն են ձեր դիտարկումները դատարանի այդ որոշման վերաբերյալ․ «Առաջին լրատվական»-ի հարցին բնապահպանության և ընդերքի տեսչական մարմնի նախկին ղեկավար Արթուր Գրիգորյանը պատասխանեց․ «Դատարանի այդ որոշումը երկու կետից է բաղկացած եղել։ Մեկը եղել է իմ անաչառության հետ կապված, մյուսը եղել է բովանդակային մասով, այսինքն՝ վեր հանված բուն խնդիրների մասով։ Երկու մասով էլ կարող են լինել առարկություններ, եթե առարկող լիներ։
Առաջին մասով դատարանն այդպիսի դիրքորոշում կարող է արտաբերել ներկա կառավարության ցանկացած պաշտոնյայի նկատմամբ, որը վեր կհանի նախկինում իր արտահայտած դիրքորոշումն այս կամ այն հարցի վերաբերյալ։ Այսինքն՝ այսօր ընթանում են պրոցեսներ վեթինգի, անցումային արդարադատության վերաբերյալ, նախկին իրականացված գողոնը վերադարձնելու վերաբերյալ։ Այսօր այդ հարցերը բարձրացնում են այն մարդիկ, որոնք ժամանակին այդ նույն հարցերն են վեր հանել, որպես քաղաքական գործիչներ, իրավապաշտպաններ և այլն։ Այսօր Երևանի ավագանում կան գործիչներ, որոնք ժամանակին պայքարել են ապօրինի շինությունների դեմ։
Բայց այսօր Երևանի ավագանու անդամները չեն կարող որոշումներ ընդունել քաղաքի ապօրինի կառույցներն ապամոնտաժելու հարցում, գործադիրը չի կարող նախաձեռնել գործընթացներ անցումային արդարադատության և նախկինում թալանվածը վերադարձնելու հարցում և այդպես շարունակ, քանի որ այդ մարմիններում ներգրավված մարդիկ նախկինում այդ հարցերի վերաբերյալ ունեցել են դիրքորոշումներ»։
Մանրամասները՝ տեսանյութում։
