«Ով հանդիպում է ահաբեկչի հետ, նա Բեն Լադենից էլ սարսափելի ահաբեկիչ է»,- այսպես է արձագանքել Վիտալի Բալասանյանը Փաշինյան-Սեֆիլյան հանդիպմանը։
Ձեզ համար պա՞րզ է, թե ինչու է Բալասանյանը թիրախավորել Փաշինյան-«Սասնա ծռեր» զույգին․ «Առաջին լրատվական»-ի հարցին «Սասնա ծռեր» համահայկական կուսակցության քարտուղարության համակարգող Վարուժան Ավետիսյանը պատասխանեց․ «Բազմիցս խոսել ենք այդ մասին, որ դա Բալասանյանի անձնական տեսակետը չէ։ Քաղաքական իմաստով Բալասանյանը, ինքնին, ոչինչ է, նա ուղղակի հանդես է գալիս որպես 5-րդ շարասյան խոսափողներից մեկը։ Ըստ այդմ, նա սպասարկում է նրանց ռևանշիստական պլանը։ Հասկանալի է, որ այնպիսի ազգային ուժ, ինչպիսին «Սասնա ծռերն» է, չեզոքացնելու է ռևանշի հնարավորությունը։ Այդ պատճառով էլ նրանք արդեն մեկուկես ամիս է չեն հանգստանում։
Եթե հիշում եք՝ ընտրությունների ժամանակ մենք հանդես եկանք երկրորդ բևեռ կազմելու կենսական անհրաժեշտության տեսակետով, որը հեղափոխական էյֆորիայի տվյալ պահի դրսևորման պայմաններում չընկալվեց։ Անշուշտ, հիմա այլ իրավիճակ է, և մարդիկ հասկանում են՝ «մի ձեռքը ծափ չի տա» կամ «մի ծաղկով գարուն չի գա»։ Բնականաբար, Հայաստանի իշխանությունը ազգային ռեսուրսը համախմբելու կարիք ունի։ Եթե դա տեղի չունենա, բնականաբար կձախողի հեղափոխական իշխանությունը։ Հիմա մենք դա չենք ուզում, իսկ 5-րդ շարասյունը շատ է ուզում»։
Իսկ վարչապետ Նիկոլ Փաշինյանը ողջունո՞ւմ է ռևանշիզմին իր բնում խեղդելու ձեր պատրաստակամությունը․ «Առաջին լրատվական»-ի հարցին Վարուժան Ավետիսյանը պատասխանեց․ «Ոչ թե մեր կողմից բնում խեղդելու, այլ դա անելու է ժողովուրդը։ Մենք ընդամենը լինելու ենք ժողովրդին մոբիլիզացնող քաղաքական ուժերից մեկը։ Վերջերս տեղի ունեցան պաշտոնանկություններ, որոնցով ռևանշի այդ էտապը խափանվեց, բայց նրանք չեն հանգստանում։ Հասկանալի է, որ նրանք պետք է շարունակեն իրենց քայլերը, քանի որ ամեն ինչ ի վերջո կորցնելու են։ Մենք համոզված ենք, որ հայկական Նյուրնբերգ ի վերջո լինելու է, և հետաքրքիր է, որ բացի մեզնից, դրանում համոզված են նաև 5-րդ շարասյան պարագլուխները, որովհետև գիտեն, թե ինչ են արել»։
Մանրամասները՝ տեսանյութում։