Ոչ իշխանական քառյակը՝ ՀԱԿ, «Բարգավաճ Հայաստան», «Դաշնակցություն» և «Ժառանգություն» խմբակցությունները երեկ հերթական հանդիպումն էին հրավիրել` քննարկելու Տիգրան Սարգսյանի հրաժարականից հետո ստեղծված իրավիճակում իրենց գործողությունների մարտավարությունը:
Իսկ ստեղծված իրավիճակը բավականին լուրջ է, քանի որ Տ. Սարգսյանի հրաժարականը տապալեց այդ ուժերի՝ շաբաթներ շարունակ պլանավորած քայլերը: Քառյակը որոշել էր ապրիլի 28-30-ին Ազգային ժողովի օրակարգ մտցնել Տ. Սարգսյանի հրաժարականի հարցը, Հայաստանում ստեղծված սոցիալ-տնտեսական ծանր իրավիճակի համար անխնա քննադատության ենթարկել նրան և այդ նախաձեռնությունը պաշտպանելու համար շուրջօրյա հանրահավաքներ անցկացնել Ազատության հրապարակում: Իսկ մինչ այդ քառյակը երեկ Գյումրիում պետք է իրազեկման հանրահավաք անցկացներ, դա կրկներ նաև Վանաձորում և այլ քաղաքներում: Բայց Գյումրիի հանրահավաքը տեղի չունեցավ, տեղի չի ունենա նաև Վանաձորինը, իսկ Ազատության հրապարակում հանրահավաք անցկացնելու հարցը կամ մտադրությունն արդեն կասկածի տակ է և քննարկվում է:
Առաջիկա մեկ ամսվա իրենց ողջ գործունեությունը Տ. Սարգսյանի հրաժարականով պայմանավորած քառյակը կարծես թե խճճվել է և չի կարողանում կողմնորոշվել: Կողմնորոշման համար հրավիրված երեկվա նիստը տևեց այնքան երկար, որ պատգամավորները զուգարան գնալու համար այն մի քանի անգամ ընդմիջեցին: Նիստը վերջին անգամ տևական ժամանակ ընդմիջվեց այն պատճառաբանությամբ, որ «Ժառանգություն» խմբակցության ղեկավար Ռուբիկ Հակոբյանը պետք է մասնակցի Ազատություն հրապարակում Րաֆֆի Հովհաննիսյանի կազմակերպած հավաքին: Իսկ ՀԱԿ խմբակցության ղեկավար Լևոն Զուրաբյանը լրագրողներին գրեթե ասելու բան չուներ, քանի որ քառյակը չէր պայմանավորվել այդ ասելիքի մասին: Բացի այդ, Լ. Զուրաբյանը նաև ասաց, թե այդ ընդմիջումն իրենք օգտագործելու են ներքին խորհրդակցությունների համար: Ըստ երևույթին, նիստում այնպիսի հարցեր են քննարկվել, կամ այնպիսի պայմանավորվածությունների կարիք է զգացվել, որ խմբակցություններն իրենց կուսակցությունների ղեկավարների հետ այն քննարկելու կարիք ունեն: Նիստը պետք է շարունակվեր երեկոյան, բայց մինչև ուշ գիշեր դրա հետ կապված որևէ տեղեկություն չհրապարակվեց:
Ամեն դեպքում Տ. Սարգսյանի հրաժարականից հետո քառյակում արտակարգ իրավիճակ է ստեղծվել: Բանն այն է, որ վարչապետի հավանական թեկնածու է համարվում Ազգային ժողովի նախագահ Հովիկ Աբրահամյանը, ով քառյակից ԲՀԿ-ի ղեկավար Գագիկ Ծառուկյանի խնամին է: Եվ եթե իսկապես Հ. Աբրահամյանը նշանակվի վարչապետ, քառյակը կամ քառյակից ԲՀԿ-ն ու ՀՅԴ-ն կաշկանդված կլինեն նրան քննադատելիս: Այս դեպքում արդեն, իսկապես այդ ուժերը լուրջ խնդրի առաջ են կանգնում: Բա էլ ո՞ւմ քննադատել, հատկապես որ` ԲՀԿ-ն ու ՀՅԴ-ն չեն քննադատում նաև Ս. Սարգսյանին: Բացի այդ, արդեն իսկ քննարկվում է նոր կառավարությունում քառյակի ուժերին ներգրավելու հարցը. Ս. Սարգսյանը նոր վարչապետ և կառավարության անդամներ նշանակելուն ընդառաջ խորհրդակցության է հրավիրել խորհրդարանական ուժերին, այդ թվում և` ՀԱԿ-ին ու «Ժառանգությանը»:
Լ. Զուրաբյանը երեկ հայտարարեց, որ իրենց պատասխանը կհայտնեն խմբակցությունում այն քննարկելուց հետո, բայց այն արդեն հայտնի է: Հիշեցնենք, որ երեկվա իր հարցազրույցում ՀԱԿ առաջնորդ Լևոն Տեր-Պետրոսյանը այսպիսի պնդում էր արել. «Ընդդիմությունը ոչ մի պարագայում խաղերի մեջ չպետք է մտնի Սերժ Սարգսյանի հետ և չպետք է մաս կազմի նրա կողմից ձևավորված որևէ կառավարության, անգամ եթե վարչապետի պաշտոնը առաջարկվի ընդդիմադիր գործիչներից մեկին»:
Այսպիսով, Տեր-Պետրոսյանը ոչ միայն հասկացրել էր, որ ՀԱԿ-ը մաս չի կազմի նոր կառավարությանը, այլ նաև քառյակի մյուս ուժերին ու հատկապես ԲՀԿ-ին էր հասկացրել, որ դա ցանկալի չէ նաև նրանց դեպքում: Մինչդեռ այս օրերին քննարկվում է, որ ԲՀԿ-ն ու ՀՅԴ-ն կարող է մաս կազմեն նոր կառավարությանը: ՀՅԴ խմբակցության ղեկավար Արմեն Ռուստամյանը հայտարարել է, որ այդ քայլին կգնան, եթե իշխանություններն ընդունեն 7 կետից բաղկացած իրենց պլատֆորմը: Իսկ ԲՀԿ խմբակցության պատգամավոր Մարտուն Գրիգորյանն էլ մեր թերթի հետ զրույցում ասել էր, թե եթե իշխանություններն ընդունեն իրենց պահանջները, ապա կառավարությանը մաս չկազմելը դառնում է «ինքնանպատակ և կապրիզի պես մի բան»:
Բայց եթե անգամ այդ երկու ուժերը կառավարությանը մաս չկազմեն էլ, միևնույն է, քառյակում արտակարգ իրավիճակ է ստեղծվել:
Նախնական տեղեկությունների համաձայն` Ս. Սարգսյանն այսօր հանդիպելու է ՀՅԴ-ի և ԲՀԿ-ի ղեկավարների հետ: Ասօր երեկոյան տեղի կունենա նաև ՀՀԿ ԳՄ նիստը, որի ժամանակ պարզ կդառնա նոր վարչապետի անունը: Նոր վարչապետի ու կառավարության դեպքում ՀՅԴ-ն ու ԲՀԿ-ն նախկին էնտուզիազմով չեն քննադատի այդ կառավարությանը և կլինեն ավելի այլընտրանքային, քան եղել են մինչ այժմ: Շրջանառվում են նաև տեղեկություններ, որ ԲՀԿ-ն միգուցե չի միանա կոալիցիային, որպեսզի 2017թ. խորհրդարանական ընտրություններին ընդառաջ կարողանա պահպանել ընդդիմադիրի կեցվածքը, փրկել դեմքն ու հաջողություն ունենալ: Կոալիցիա մտնելու դեպքում կկորցնի ընդդիմադիրի կեցվածքն ու միգուցե նաև` հաջողությունը:
Այս իրավիճակում ՀՅԴ-ն կարծես թե չի կարողանում ինքնուրույն որոշում կայացնել: Եվ այդ կուսակցության որոշումն ինչ-որ առումով կապված է ԲՀԿ-ի որոշումից: ՀՅԴ-ն կցանկանար մտնել կոալիցիա, սակայն եթե ԲՀԿ-ն չմտնի, դա չի կարող անել նաև ինքը, հակառակ դեպքում ավելի ակնհայտ կդառնա, որ պայքարում է պաշտոնների համար: Այնպես որ` ՀՅԴ-ի որոշումն էլ կարող է պայմանավորված լինել իր մեծ եղբոր` ԲՀԿ-ի որոշումից: Այս պարագայում ՀԱԿ-ն ու «Ժառանգությունն» էլ հայտնվում են լքված վիճակում: Ամիսներ, անգամ տարիներ շարունակ ձգտել են ԲՀԿ-ին պոկել իշխանությունից, բայց իրավիճակի փոփոխության արդյունքում այդ կուսակցությունն այլևս չի կարող ընդդիմություն խաղալ: Իսկ մեր այն հարցին, թե նման պարագայում արդյոք վտանգված չէ՞ քառյակի գոյությունը, Լ. Զուրաբյանը հորդորեց շատ դրամատիկ չընկալել իրավիճակը:
