Հայաստանի պետական տնտեսագիտական համալսարանի այն ուսանողները, որոնք մամուլում պարբերաբար հրապարակում են համալսարանի ռեկտորի պաշտոնակատար Դիանա Գալոյանի ատենախոսությունում, գիտական հոդվածներում տեղ գտած արտագրությունների, copy-paste-ի դեպքերը, աննահանջ են։ Նրանք հերթական copy-paste-ի դեպքն են հրապարակել մամուլում՝ պնդելով, որ ԿԳՄՍ նախարարին չի հաջողվելու կոծկել դրանք և հովանավորել Դիանա Գալոյանին։
Օրեր առաջ Դիանա Գալոյանը, արձագանքելով մեր հարցմանը, դիմել էր կրթության, գիտության, մշակույթի և սպորտի նախարար Արայիկ Հարությունյանին և Բարձրագույն որակավորման կոմիտեի նախագահ Սմբատ Գոգյանին․ «Ներկայիս կառավարությունը օբյեկտիվորեն անընդունելի է համարում ոչ բարեխիղճ գիտական վարքագիծը, որին պատշաճ գնահատական չի տրվել նախկինում, սակայն օրենսդրական բացի պատճառով սույն խնդիրը դեռ մնում է առկախված: Ուստի ինքս եմ գրավոր դիմում ԿԳՄՍ նախարար Արայիկ Հարությունյանին և ԲՈԿ նախագահ Սմբատ Գոգյանին՝ հանձնաժողով ստեղծելու, իմ դոկտորական ատենախոսությունը ուսումնասիրելու և համապատասխան գնահատական տալու խնդրանքով:
Հայցում եմ նաև 008 մասնագիտական խորհրդի և ընդդիմախոսներիս ներողամտությունը, քանի որ իմ այս քայլը բնավ նպատակ չունի կասկածի տակ դնելու իրենց մասնագիտական եզրակացությունը, այլ պայմանավորված է իմ մի քանի գիտական հոդվածների մասին շարունակաբար, տարբեր հարթակներից հնչեցվող գնահատականներով, որոնք էապես ազդում են ՀՊՏՀ վարկանիշի վրա և վնասում են բուհում ձևավորված առողջ բարոյահոգեբանական մթնոլորտը»։
ԲՈԿ-ի նախագահ Սմբատ Գոգյանից հետաքրքրվեցինք, թե պատրաստվո՞ւմ են ստեղծել հանձնաժողով։
ԲՈԿ-ի նախագահը պատասխանեց, որ եթե ուզում են հանձնաժողով ձևավորել, ապա ԲՈԿ-ը կապ չունի, կարող են գիտնականների հանձնաժողով ձևավորել, մասնագիտական քննարկում անցկացնել։
Իսկ ի՞նչ հետևություններ է արել պարոն Գոգյանը Դիանա Գալոյանի գիտական հոդվածներում արտագրությունների դեպքերը հրապարակելուց հետո։
«Մենք աստիճանաշնորհման գործընթաց ենք իրականացնում։ ՀՊՏՀ նախկին ռեկտոր Ռուբեն Հայրապետյանի դեպքում վարչապետի հանձնարարականով հանձնաժողով ստեղծեցինք, ԲՈԿ-ի նախագահը նրա համանախագահն էր։ Դրա համար ես հանձնաժողովի եզրակացության մասին խոսեցի։ Իսկ մնացած դեպքերի հետ կապ չունեմ»,- ասաց Սմբատ Գոգյանը։
Մեր դիտարկմանը, թե ՀՊՏՀ ուսանողները նախարարությանը մեղադրում են կողմնակալության, Դիանա Գալոյանին հովանավորելու մեջ, ԲՈԿ-ի նախագահն արձագանքեց․ «Ես չեմ կարող մեկնաբանել, դա ԲՈԿ-ի գործառույթներից դուրս է։ Եթե ինձ հանձնարարվի զբաղվել Դիանա Գալոյանի ատենախոսությամբ, կզբաղվեմ։ Պետք է հասկանանք՝ ԲՈԿ-ի նպատակը Հայաստանում ո՞րն է, հո գրագողության դեմ պայքարի կոմիտե չենք։ Հայաստանում տնտեսագետների միություն գոյություն ունի՞, թե՞ ոչ։ Գիտության կոմիտե գոյություն ունի, չէ՞, որը գիտությունը համակարգում է։ Երբ մաթեմատիկոսների մոտ է նման խնդիր ծագել, իրենք իրենց ռեսուրսներով դեմն առել են, ոչ ոք չի իմացել՝ մասնագիտական ոլորտում պետք է լինեն այդ քննարկումները, վարկաբեկվում է, չէ՞, մասնագիտությունը»։