Աշխաբադում ԱՊՀ մասնակից պետությունների ղեկավարների խորհրդի նեղ կազմով նիստում ՀՀ վարչապետ Նիկոլ Փաշինյանը կոշտ պատասխան է տվել Ադրբեջանի նախագահ Իլհամ Ալիևին, որն իր ելույթում «ֆաշիստական դահիճ» և «դավաճան» է համարել Գարեգին Նժդեհին: Նիկոլ Փաշինյանն ընդգծել է, որ Ալիևի ելույթը պատմական իրադարձությունների սուբյեկտիվ մեկնաբանման փորձ էր: «…Իրականությունն այն է, որ Գարեգին Նժդեհը պայքարել է Թուրքիայի կողմից Հայաստանի օկուպացման դեմ, պայքարել է Հայոց ցեղասպանության դեմ և բազմաթիվ ռուս սպաների հետ 1918 թվականին հայ-թուրքական պատերազմի ժամանակ ղեկավարել է ռազմաճակատի շատ կարևոր հատվածը…»,- ասել է ՀՀ վարչապետը:
Թեմայի շուրջ «Առաջին լրատվական»ի հետ քննարկմանը մասանկցեցին վերլուծաբաններ Աղասի Մարգարյանը, Գառնիկ Գևորգյանը և ԱԺ «Իմ քայլը» խմբակցության պատգամավոր Տաթև Հայրապետյանը: Գառնիկ Գևորգյանի դիտարկմամբ՝ ԱՊՀ երկրների ղեկավարների նիստում այդ ինտրիգային դրվագը եթե չլիներ, այդ հանդիպումը մեծ ուշադրության չէր արժանանա և կներկայացվեր զուտ պաշտոնական լրահոսի մակարդակում: Վերլուծաբանի խոսքով՝ ԱՊՀ-ն անիմաստ կառույց է, և այնտեղ ընդամենը արարողակարգային միջոցառումներ են իրականացվում. «ԱՊՀ-ից որևէ այլ գործառույթ մենք չենք տեսել»: Անդրադառնալով միջադեպին, Գ. Գևորգյանն ընդգծեց, որ Նիկոլ Փաշինյանն Ալիևին պատասխանլ է համարժեք: «Փաշինյանի այդ պատասխանն ուներ ավելի հետաքրքիր շերտ, քան Ալիևին հակադարձումն է, խոսքը Ռուսաստանի ղեկավարությանը և քաղաքական շրջանակներին ուղղված ակնարկի մասին է»,- նշեց վերլուծաբանը:
Տաթև Հայրապետյանը նկատեց, որ ԱՊՀ հարթակում Ալիևի ելույթին նախորդել է Վալդայում նրա հայտարարությունը. «Ղարաբաղը Ադրբեջան է!», որից հետո Բաքվում մի քանի օր է ֆլեշմոբ է: «Ալիևը Բաքվում հայտարարել էր, որ Փաշինյանին պատասխանելու է միջազգային հարթակից, և Փաշինյանի արձագանքի մեջ կար նաև հետևյալ ուղերձը՝ այս փոխհրաձգությունը չտեղափոխես միջազգային հարթակ՝ նաև երկրի առաջին դեմքերի մակարդակով: Ալիևին հստակ և համարժեք պատասխան տրվեց»,- նշեց պատգամավորը:
Աղասի Մարգարյանը նկատեց, որ հասարակական-քաղաքական որոշակի շրջանակներ՝ հիմնականում նախորդ իշխանության ներկայացուցիչներ, որոնք մինչ այս պահը սուր և հաճախ անհիմն քննադատության են ենթարկել իշխանությանը և վարչապետին, այս դրվագը փորձեցին օգտագործել՝ ցույց տալու համար, որ վարչապետի հետ միասնական են, երբ հարցը վերաբերում է արտաքին հարաբերություններին:
Անդրադառնալով Թուրքիայի ներխուժմանը Սիրիա՝ Գ. Գևորգյանն ընդգծեց. «Այս ամենը տեղի է ունենում միջազգային հանրության լուռ, քնքուշ դատապարտումների քողի տակ, ՄԱԿ-ի անվտանգության խորհուրդը հանդես չի գալիս հայտարարությամբ, իսկ պատերզամը շարունակվում է»: Սիրիա հումանիտար առաքելություն ուղարկելը, ըստ վերլուծաբանի, արկածախնդիր որոշում էր, և ցանկացած պահի կարող է ներքաշվել սպեկուլյատիվ գործողության մեջ. «Բայց դժվար է ասել, թե հետ կանչելն ինչ հետևանք կունենա»:
Տաթև Հայրապետյանը հավաստիացրեց, որ Հայաստանը պատրաստ է ցանկացած պահի տարհանել սիրիահայերին:
Անդրադառնալով դիտարկմանը, որ փորձ է արվում Հայաստանի և Արցախի միջև լարում ստեղծել՝ որոշակի նպատակ հետապնդելով՝ Գ. Գևորգյանն ընդգծեց. «Այդ սուբյեկտները սպասարկում են նախկին համակարգի շահերը: Վ. Բալասանյանը այդպիսի հայտարարություններ անում է ոչ թե Երևանի և Ստեփանակերտի միջև լարվածություն առաջացնելու համար, այլ իր կարծիքն է թելադրում, նա սպասարկում է այն քաղաքական խմբակի շահերը, որի ոչ ֆորմալ ներկայացուցիչն է, իսկ դա նախկին իշխանական՝ քոչարյանական և «հանրապետական» շրջանակներն են: Այդ հայտարարության հետևանքով որոշակի լարվածություն առաջանում է, բայց Վիտալի Բալասանյանն Արցախը չէ»:
Մանրամասն՝ տեսանյութում: