Վարչապետ Տիգրան Սարգսյանին հաջորդեց նաև կառավարության հրաժարականը: Եվ այս օրերին երբ քննարկվում է հարցը, թե ով է լինելու Հայաստանի 13-րդ վարչապետը, զուգահեռ քննարկվում է նաև այն հարցը, թե հին կառավարության կազմից ով կվերանշանակվի իր պաշտոնում կամ կրկին կհայտնվի գործադիրում:
«Առաջին լրատվական»-ի տեղեկություններով՝ Տ.Սարգսյանը հրաժարականից հետո կառավարությունում իր թիմի անդամներին հորդորել է չհեռանալ: Բանն այն է, որ Մաքսային միության հետ տարբեր մակարդակի բանակցությունները տարվում են արդեն նախկին վարչապետի թիմակիցները համարվող պաշտոնյաների կողմից: Արտաքին գործերի նախարարությունից փոխնախարար Շավարշ Քոչարյանը, Էկոնոմիկայի նախարարությունից փոխնախարար Կարինե Մինասյանը, ինչպես նաև ֆինանսների փոխնախարար Սուրեն Կարայանը: Եվ եթե այս պաշտոնյաները դուրս գան, ՄՄ-ի բանակցությունները կխաթարվեն, ու վերսկսելու համար ժամանակ պետք կլինի: Նոր պաշտոնյաները պետք է ծանոթանան արված աշխատանքին ու կարողանան շարունակել այն:
Բաց այդ՝ Տ.Սարգսյանի հետ ցանկացել են հեռանալ նրա հիմնական թիմակիցները՝ կառավարության աշխատակազմի ղեկավար, նախարար Վաչե Գաբրիելյանը, ֆինանսների նախարար Դավիթ Սարգսյանը, ինչպես նաև Էկոնոմիկայի նախարար Վահրամ Ավանեսյանը և մի շարք այլ պաշտոնյաներ, որոնք կարևոր դերակատարություն ունեն Համաշխարհային բանկի ու միջազգային տարբեր կառույցների հետ իրականացվող ծրագրերում: Եվ քաղաքական կուլիսներում շրջանառվող խոսակցությունների համաձայն՝ Տ.Սարգսյանը նրանց հորդորել է չհեռանալ և շարունակել իրենց աշխատանքը նոր կառավարությունում:
Նույն տեղեկությունների համաձայն՝ այս պաշտոնյաները համաձայնել են շարունակել պաշտոնավարել, սակայն ավելացրել են, որ առանց որևէ կասկածի կհեռանան, եթե վարչապետ նշանակվի Ազգային ժողովի նախագահ Հովիկ Աբրահամյանը: Նրանք կտրականապես դեմ են արտահայտվել, թե երբևէ կաշխատեն Հ.Աբրահամյանի հետ: Նման մի ակնարկ անցած շաբաթ Տ.Սարգսյանի հրաժարականի հաջորդ իսկ օրը հրապարակավ արել էր Վ.Ավանեսյանը: «Դա կախված է նրանից, թե ինչպիսի կառավարություն է ձևավորվելու, ինչպիսի ծրագրերի շուրջ, և արդյոք առաջարկելո՞ւ են ինձ կառավարությունում»,- լրագրողների հետ հանդիպման ժամանակ հայտարարել էր նա։
Եվ եթե, իսկապես, Հ.Աբրահամյանը նշանակվի վարչապետ, պետական կառավարման համակարգն այդ առումով դժվարություններ կունենա, որովհետև ՄՄ-ի, Համաշխարհային բանկի ու միջազգային այլ կառույցների հետ ծրագրերը համակարգում են Տիգրան Սարգսյանի թիմակիցները: Ընդ որում միջազգային նույն կառույցներից էլ ակնարկ է եղել, որ իրենց համար այդ պաշտոնյաների փոփոխությունը ցանկալի չէ, հակառակ դեպքում կդժվարանան իրենց աշխատանքն ու հարաբերությունները:
