Եգիպտոսի հարավում հակամարտող ցեղերը եռօրյա զինադադար են հաստատել: Զինադադարի ձեռքբերումը հաջողվել է երկրի իշխանության ներկայացուցիչների միջնորդությամբ: Այն ուժի մեջ է մտնում այսօր: Այս մասին հայտնում է ITAR-TASS-ը:
«Բենի խալյալ» և «դաբուդիա» կլանների միջև հակամարտությունը սկսվել էր անցած ուրբաթ Ասուան նահանգում դպրոցականների լեզվակռվից: Շաբաթ գիշերը կռվում ներքաշվել էին երկու ցեղերի մեծ թվով ներկայացուցիչներ, գործի էր դրվել հրազեն և սառը զենք, ինչպես նաև դյուրավառ խառնուրդով շշեր: Երեք օր տևած կոտորածի հետևանքով զոհվել է 26, տուժել մի քանի տասնյակ մարդ, հրկիզվել է մի քանի բնակելի տուն: Զոհերի թվում կան նաև կանայք և երեխաներ:
Կողմերին հանդարտեցնելու ոստիկանության բոլոր փորձերն ավարտվել են անհաջողությամբ: Նրանց օգնության են կանչվել զինված ուժերի ստորաբաժանումները, Ասուանում իշխանությունները պարետային ժամ են սահմանել: Կարգուկանոնի հաստատման գործում գործի է դրվել նաև բանակային հատուկ ջոկատ:
Նահանգապետ Մուստաֆա Յուսրիի խոսքով՝ պայմանավորվածությունը ձեռք է բերվել կլանների ավագների հանդիպմանը, որն անցկացվել է իշխանությունների կողմից ստեղծված հաշտեցնող կոմիտեի միջնորդությամբ:
Կողմերը պայմանավորվել են իրավապահ մարմիններին հնարավորություն տալ հայտնաբերելու մեղավորներին: Գործարքը նախատեսում է նաև բախումների ժամանակ պատանդվածների ազատ արձակում:
