Այսօր՝ Եվրոպայի խորհրդի խորհրդարանական վեհաժողովի գարնանային նստաշրջանի առաջին օրը, կառույցի նախագահ Անն Բրասյորը մամուլի ասուլիս է հրավիրել, որում մանրամասն ներկայացրել է նիստի օրակարգն ու քննարկվելիք գլխավոր հարցերը՝ հայտնում է APA-ն:
Պատասխանելով ԵԽԽՎ Լեռնային Ղարաբաղի հարցով ենթահանձնաժողովի հետագա ճակատագրի մասին հարցին՝ Բրասյորն ասել է, որ Ադրբեջանի և Հայաստանի պատվիրակությունների ղեկավարների միջև հանդիպումները կշարունակվեն:
«Գիտեք, այստեղ պետք է երկխոսություն վարել առաջին հարմար առիթի դեպքում: Դա պետք է ընթանա առանց փոխադարձ մեղադրանքների, ուղղակի նստել ու խոսել: Դրա համար ես, ինչպես նաև մյուս նախագահները, հավատարիմ մնալով ավանդույթին, կփորձեմ շարունակել երկու երկրների պատվիրակությունների միջև երկխոսությունը:
Ես մտադիր եմ երկու պատվիրակությունների ղեկավարներին հրավիրել իմ աշխատասենյակ և նրանց հետ կարծիքներ փոխանակել այս հարցի շուրջ: Ցավոք, նախորդ նստաշրջանին ես նրանց հետ առանձին-առանձին եմ հանդիպել, չհաջողվեց նրանց միասին հավաքել: Այսուհետ ես կփորձեմ հասնել համատեղ հանդիպումների, քանի որ այս երկխոսությունը պետք է ակտիվացնել: Այս նստաշրջանի ընթացքում ես նորից կփորձեմ միասին հավաքել պատվիրակությունների ղեկավարներին և նրանց միջև փոխըմբռնման մթնոլորտ ստեղծել: Մենք պետք է որոշենք՝ ինչ քայլեր կարող ենք ձեռնարկել հետագայում քննարկումները շարունակելու համար»,- նշել է Բրասյորը:
