Ռուսաստանը ԵԱՀԿ Միսնկի խմբի համանախագահներից մեկն է և միջնորդի իր գործառույթը պետք է կատարի: Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Միքայել Զոլյանը՝ անդրադառնալով ՌԴ ԱԳ նախարար Սերգեյ Լավրովի հայտարարությանը, թե ԼՂ հարցի կարգավորման շուրջ քաղաքական գործընթացն արգելակվել է:
«Դա ենթադրում է, որ եթե դու այս կամ այն կողմի հետ չես համաձայնում և փորձում ես երկու կողմերին էլ սաստել, այսպես ասած: Այդ առումով Լավրովի հայտարարությունները այս շրջանակներում են տեղավորվում»,-ասաց նա:
Ինչ վերաբերում է գործընթացի արգելակման մասին նրա հայտարարությանը, Զոլյանն ասաց. «Այստեղ լավովն ընդամենը նկարագրում է իրականությունը, որ այս պահին ակտիվ գործընթաց չկա: Բայց Լավրովը նաև նշեց, որ ռազմական էսկալացիայի վտանգ չի տեսնում: Բոլորին ակնհայտ է, որ հիմա արցախյան կարգավորման հարցում մեծ առաջադիմություն չկա: Այլ խնդիր, որ Լավրովը չանդրադարձավ դրա պատճառներին: Իմ կարծիքով, պատճառն այն է, որ Ադրբեջանը կառուցողական դիրքորոշում չունի և ուզում է եման ինչ և միանգամից ստանալ»:
