Хроника Туркменистана իրավապաշտպան կայքը հայտնում է, որ Աբադանում տեղի ունեցած պայթյունի հետևանքով տուժածների թիվը կազմում է 1382 մարդ: Հայտարարության տեքստից պարզ չէ, թե նրանցից քանիսն են մահացել: Կայքը հավաստի աղբյուրներից տեղեկություններ ունի, որ տուժածների մեկ երրորդը երեխաներ են:
Աբադանի ռազմական պահեստները, որոնք Թուրքմենստանի մայրաքաղաք Աշգաբադից գտնվում են 20 կիլոմետր հեռավորության վրա, բռնկվել են հուլիսի 7-ին: Այնտեղ գտնվող ռազմամթերքը պայթել և ցրվել է հեռավոր վայրերում մինչև հուլիսի 8-ը: Իշխանությունները սկզբնապես հերքել են այն լուրը, որ պայթել է ռազմամթերքը: Հուլիսի 10-ին նրանք հաստատել են, որ այնտեղ այրվել է ռազմամթերքի պահեստը, որի հետևանքով 15 մարդ է զոհվել:
Хроника-ի տվյալներով, Գյունեշ գյուղում, որն ամենամոտն է պահեստներին, հիմնահատակ ավերվել է 127 բնակելի տուն:
Իրավապաշտպանները որոշ տեղեկություններ են հայտնում պայթյունի մասին: «Հրթիռներն ընկել են հիվանդանոցի, ինչպես նաև ծննդատան վրա: Զոհվել է առնվազն 30 մարդ, որոնց թվում նաև նորածիններ»,- փոխանցում է կայքը: Բացի այդ, հրթիռն ընկել է երեխաների 30 հոգանոց խմբի վրա, որոնք այդ պահին համակարգչային գրագիտության դասընթացների էին գնում: «Ոչ մեկի դիակն անգամ չի մնացել, մնացել են նրանց մարմինների կտորները», – հայտնում է «Хроника»-ն՝ հղում կատարելով ականատեսների վկայություններին:
Իրավապաշտպանները պնդում են, որ երկրորդ օրն է Գյունեշում և Աբադանում աշխատում են ռուսական ԱԻՆ մասնագետները: Նրանց տվյալներով, Թուրքմենստանի նախագահ Գուրբանգուլի Բերդիմուհամեդովը դեմ է եղել նրանց այցին, սակայն սեփական ուժերով նրանք ի վիճակի չեն եղել հաղթահարել աղետի հետևանքները: Հուլիսի 8-ին ԱԻՆ-ում ասել են, որ թուրքմենական կողմից օգնության խնդրանք չի եղել:
Хроника-ին (կայքը միակն է, որը տեղեկություններ է հայտնում Աբադանի դեպքերից) պաշտպանության նախարարությունում ասել են, որ պայթյունները տեղի են ունեցել տեխնիկական անվտանգության կանոնների խախտման և անփույթ վերաբերմունքի հետևանքով: Նախագահ Բերդիմուհամեդովն արդեն գործից հեռացրել է պաշտպանության փոխնախարարին և աստիճանազրկել նախարարին: