«Հանրապետություն» կուսակցության քաղխորհրդի անդամ, ներքին գործերի նախկին նախարար Սուրեն Աբրահամյանի կարծիքով՝ վարչապետ Տիգրան Սարգսյանի հրաժարականը պայմանավորված չէ արտաքին կամ ներքին ճնշումներով: Նա նման տեսակետ հայտնեց «Առաջին լրատվական»-ի հետ զրույցում՝ ընդգծելով, որ այդ հարցը վաղուց արդեն հասունացել էր:
«Իմ կարծիքով՝ դա արվեց զուտ վարչապետի շուրջ ստեղծված այս լարվածությունը պարպելու համար: Դա երևի ավելի շատ հոգեբանական քայլ էր, քան որոշակի պարտադրանք»,- ասաց նա:
Հարցին, թե չի՞ կարծում, որ որոշակի պարտադրանք է եղել, Սուրեն Աբրահամյանը պատասխանեց․ «Ինձ թվում է՝ չկա: Ոմանք բացատրում են իշխանությունների թուլացմամբ, բայց ես նման բան բացարձակապես ես չեմ տեսնում:
Ընդհանուր առմամբ՝ շատ նորմալ եմ ընդունում, որովհետև, վերջին հաշվով, այս երկիրն էլ պետք է սովորի, որ պաշտոնատար անձինք որոշակի պատասխանատավություն պետք է կրեն և հենց հրաժարականի ձևով»:
Մեր զրուցակցից հետաքրքրվեցինք նաև, թե վարչապետի փոփոխությունը հնարավո՞ր է դրական փոփոխության բերի: «Եթե դրանից հետո ժողովրդի համար ընկալելի նշանակում լինի, և հաջորդ քայլը լինի որոշակի համակարգային փոփոխություններ կատարելը, ապա կառավարության շուրջ ստեղծված այս վատ մթնոլորտը մեղմելու առումով իհարկե դրական կարող է լինել, իսկ եթե Ալո-ն Բլոյով են փոխելու՝ շատ բան մի՛ սպասեք»,- եզրափակեց նա:
Լուսանկարը` PanARMENIAN Photo-ի
