Ինդոնեզիան 1.8 մլն դոլար փրկագին կվճարի՝ ըստ իսլամական սովորույթի փրկելու Սաուդյան Արաբիայում մահապատժի դատապարտված ինդոնեզացի սպասուհուն: Այս մասին հայտնում է BBC-ն: Սատինա անունով կինը մահապատժի էր դատապարտվել այն բանից հետո, երբ դատարանը նրան մեղավոր էր ճանաչել գործատուի սպանության մեջ, որը տեղի էր ունեցել 7 տարի առաջ:
Կինը հարվածել էր գործատու կնոջը, որից հետո վերջինս հայտնվել էր կոմայի մեջ, այնուհետև մահացել: Հարձակումից հետո սպասուհուն հաջողվել էր փախչել ավելի քան 10 հազար դոլարով, սակայն ոստիկանությունը բռնել էր նրան: Դատարանում կինը պատմել է, որ գործել է ինքնապաշտպանության նկատառումներով և հարվածել է տիրուհուն այն պատճառով, որ նա բռնել էր իր մազերից ու գլուխը պատին էր հարվածում:
Դեպքը մեծ արձագանք էր ստացել դատապարտյալի հայրենիքում: 41-ամյա ինդոնեզուհուն փրկելու համար դրամահավաքը սկսել էին նրա հարազատներն ու նրան կարեկցողները: Այնուհետև նրանց էին միացել քաղաքական գործիչներ, աստղեր, հասարակական գործիչներ:
Հիմնական դժվարությունը կայանում է նրանում, որ զոհի ընտանիքը, որն իջեցրել է «փրկագինը», գործի հերթական քննությունից առաջ կրկին բարձրացրել է գինը: Դրանից հետո Ինդոնեզիայի կառավարությունը որոշել է գումարի չբավականացնող մասն ինքնուրույն վճարել: Կառավարության որոշումը, սակայն, ոչ բոլոր ինդոնեզացիներն են հավանության արժանացնում: Այժմ դատարանը կվերանայի կնոջ գործը:
