«Մինչ այս մեր պետական ապարատը ամեն կերպ ցույց էր տալիս, որ իրենք շատ լավ համագործակցում են ԱԱԾ-ի և ոստիկանության հետ, և մեկ էլ հանկարծ լինում է այսպիսի իրավիճակ»,- «Առաջին լրատվական»-ի հետ զրույցում ասաց կրթության փորձագետ, «Քաղաքացու որոշում» կուսակցության գործադիր մարմնի անդամ Արեգ Թադևոսյանը՝ հավելելով, որ ինքը չգիտի, թե «ով ում թանին է թթու ասել»:
Մեր զրուցակցի խոսքով՝ ինքը մարդկայնորեն հասկանում է ԱԱԾ արդեն նախկին պետին, որ չէր կարողանում այս «խառը-խշտիկ» պայմաններում աշխատել. «Երբ այսօր մի բան է հայտարարվում և պնդվում, վաղը՝ մեկ ուրիշ բան, մի կես ժամ հետո կարող է լրիվ այլ բան լինի, նման պայմաններում չես կարող քո ամբողջ կառույցի աշխատակիցներին ասել՝ տրամաբանությունը փոխվեց, հիմա բոլորս գնում ենք այս ուղղությամբ: Եվ հնարավոր է մարդը հասկանա, որ իր մենեջերական հնարավորություններն այլևս չեն հերիքում, և ինքը չի կարող այդպես աշխատել»:
Արեգ Թադևոսյանի խոսքով՝ մեր կառավարման և ինֆորմացիոն դաշտը վերածվել է այնպիսի թնջուկի, որ «շունը տիրոջը չի ճանաչում». «Նորմալ չի, որ երկրի ղեկավարը իր բանալի կառույցներից մեկի ղեկավարին ասում է՝ գնա ֆուտբոլով զբաղվիր: Նման բան կարող էր ասել մի շատ դեղին լրատվամիջոցի ներկայացուցիչ»:
Նրա խոսքով՝ Փաշինյանի վերջին հայտարարությունը ևս շատ մերկապարանոց է և իրավիճակային. «Իշխանությունները չեն կարող լուրջ քայլերի գնալ, որովհետև դրա համար ժամանակ կար: Այժմ իրենք էլ են հայտարարում, որ պետք է աշխատեն ինչ-որ խաղի կանոնների պայմաններում: Այդ խաղի կանոնները կարող էին և պետք է խախտեին, երբ խառը և հեղափոխական իրավիճակ էր: Մենք հիմա մտել ենք երկարաժամկետ աննորմալ պրոցեսների մեջ: Ես չեմ կարծում, որ Նիկոլ Փաշինյանի կախարդական փայտիկը հիմա մագիա կանի մեր երկրում, և այդ արատավոր երևույթները կսկսեն թըփ-թըփ-թըփ՝ արագ վերանալ: Ես այն ժամանակ էլ էի ասում, որ այդ կախարդական փայտիկը միֆ է, հիմա էլ եմ ասում»:
Հարցազրույցն ամբողջությամբ՝ տեսանյութում:
