Ռուսական մամուլը հիշեցնում է Տիգրան Սարգսյանի՝ եվրաինտեգրացիայի կողմնակիցը լինելու մասին: ՀՀ վարչապետ Տիգրան Սարգսյանի հրաժարականի փաստն ակտիվորեն լուսաբանում են նաև ռուսական հեղինակավոր լրատվամիջոցները: Ռուսական մամուլը զերծ չի մնում նաև ՀՀ վարչապետ Տիգրան Սարգսյանին պիտակավորելուց: Չէ՞ որ Տիգրան Սարգսյանն այն վարչապետն էր, որը մինչ ՄՄ-ին անդամակցելու մասին Սերժ Սարգսյանի որոշումը բացառում էր ՀՀ անդամակցությունը ՄՄ-ին, ինչը հարուցում էր ՌԴ իշխանական շրջանակների զայրույթը:
Մասնավորապես՝ նրա հայտնի դիտարկումներն այն մասին, թե Հայաստանը չունի մտադրություն և տեխնիկապես չի կարող միանալ Մաքսային միությանը, ռուսական դժգոհության վերջին նոտան էր: Ռուսաստանցի փորձագետները նույնիսկ չէին բացառում, որ Կրեմլը դեմ չի լինի, եթե ՀՀ նախագահ Սերժ Սարգսյանը որոշի ազատել Տիգրան Սարգսյանին զբաղեցրած պաշտոնից:
Օրեր առաջ Բրյուսելում ՀՀ վարչապետ Տիգրան Սարգսյանը հերթական անգամ առաջարկել էր ԵՄ ղեկավարներին Հայաստանի հետ ևս նախաստորագրել Ասոցացման համաձայնագրի քաղաքական բաղադրիչը, ինչպես Ուկրաինայի դեպքում: Նույնիսկ օրերս Ռուսաստանի Դաշնության 1-ին կարգի պետական խորհրդական, REX գործակալության ղեկավար, քաղաքագետ Մոդեստ Կոլերովն «Առաջին լրատվական»-ի հետ զրույցում հիշեցրել էր այս մասին, ապա տեսակետ հայտնել, թե վարչապետի ճակատագիրը կախված է միայն Սերժ Սարգսյանից և ոչ թե այլ պատճառներից ու միավորումներից, մանավանդ՝ ՀԱԿ-ԲՀԿ-ից:
Տիգրան Սարգսյանի հրաժարականին են անդրադարձել ռուսական «Ռեգնումը», «ԻՏԱՐ ՏԱՍՍ» հեղինակավոր լրատվական գործակալությունը, «Ազատություն» ռադիոկայականի ռուսական ծառայությունը, «Էխո Մոսկվի» ռադիոկայանի կայքէջը, РБК գործակալությունը, Russia Today-ը, «ՐԻԱ-Նովոստի»-ն, «Լենտա» լրատվականը, «Դոժդ» հեռուստատեսային կայքէջը, Вестник Кавказа կայէջը, «Ինտերֆաքս» գործակալությունը:
Ամենահամարձակ անդրադարձն այս պահի դրությամբ ռուսական «Վեդոմոստի»-ինն է, որն իր ընթերցողին հիշեցրել է Սարգսյանի կառավարման ժամանակաշրջանն ու իրականացրած քաղաքականությունը՝ նրան որակելով, որպես եվրաինտեգրացիայի կողմնակից վարչապետ: «Վեդոմոստի»-ն նաև հիշեցրել է, որ վարչապետը մտադիր էր Արևելյան գործընկերության վիլնյուսյան գագաթնաժողովի ընթացքում նախաստորագրել ՀՀ-ԵՄ Ասոցացման համաձայնագիրն ու Խոր և համապարփակ ազատ առևտրի գոտու պայմանագիրը, որը ձախողվել է ՀՀ նախագահ Սերժ Սարգսյանի՝ սեպտեմբերին Մոսկվա կատարած այցով, որի ընթացքում սեպտեմբերի 3-ին ՀՀ առաջնորդը հայտարարել է Ռուսաստանի կողմից ղեկավարվող Մաքսային միությանն ու ռուսական ինտեգրացիոն պրոյեկտներին միանալու ցանկության մասին:
Ի դեպ, ՀՀ վարչապետի հրաժարականն են լուսաբանում նաև ադրբեջանական կայքէջերը:
