«Փաշինյանը և Ամուլսարի հանքի շահագործման կողմնակիցները անընդհատ որոնումների մեջ են, թե ինչ կերպ արդարացնեն հանքի շահագործումը՝ ակզբում հնչեցվում էին բնապահպանական հայտարարություններ, հետո՝ իրավական, քաղաքական, հիմա անվտանգության հետ են կապում»,- «Առաջին լրատվական»-ի հետ զրույցում ասաց «Քաղաքացու որոշում» կուսակցության գործադիր մարմնի անդամ Գարեգին Միսկարյանը՝ անդրադառնալով վերջին ասուլիսում վարչապետ Փաշինյանի՝ Ամուլսարի հատվածին առնչվող հայտարարություններին:
Նրա խոսքով՝ անվտանգության հետ կապված Փաշինյանի վերջին հիմնավորումը, մյուսների նման, շատ թույլ է. «Պետք է հաշվի առնել, որ այդ հանքից մեզ միայն հարկերն են մնալու: Եթե դա այդքան ռազմավարական նշանակության հարց է, ապա ինչու չպետականացնել բոլոր հանքերը, որպեսզի պատերազմում հեշտ լինի հաղթահարել այդ ճգնաժամը: Ստացվում է, որ «Լիդիանից» է կախված՝ պատերազմում մենք կհաղթե՞նք, թե՞ կպարտվենք»:
Գարեգին Միսկարյանի կարծիքով՝ վարչապետը հազիվ թե այդքան ժամանակ ունենա ուսումնասիրելու հանքարդյունաբերության ամբողջ դաշտը. «Շատ մեծ հարցական է, թե ով է այդ մարդը, որը նման սխալ տեղեկություններ է տալիս, և անձնական ինչ շահագրգռություններ ունի հանքի շահագործումից»:
Ջերմուկ քաղաքի բնակիչ Շիրակ Բունիաթյանն էլ նշեց, որ ԷԼԱՐԴ-ի հետ տեսակապից հետո Ամուլսարի հարցը դուրս է եկել բնապահպանական տիրույթից, և այն այլևս քաղաքական է. «Եթե բյուջեի սուղ միջոցներից այդ ընկերությանը տրամադրվում է գումար, և տվյալ մասնագետները հայտնում են կարծիք, ըստ որի՝ տվյալ ՇՄԱԳ-ով չի կարելի շահագործել Ամուլսարում հանք, և շարունակում է պնդվել այն միտքը, որ Ամուլսարում պետք է ծավալվի հանքարդյունաբերություն, դա արդեն քաղաքական որոշում է»:
Հարցազրույցն ամբողջությամբ՝ տեսանյութում:
