Չինաստանը մոտակա 5 տարիների ընթացքում 1.5 տրլն յուան (231.9 մլրդ դոլար) է ներդնելու ավիացիայի բնագավառը զարգացնելու համար: Այս մասին հայտնում է China Daily-ն՝ հղում կատարելով Shanghai Securities News թերթին:
ՉԺՀ քաղաքացիական ավիացիայի աշխատակազմի ղեկավարի՝ Լի Ցզանսյանի խոսքերով՝ մեկ տարվա ընթացքում երկրի իշխանությունները կորոշեն ավիաոլորտի զարգացման և նորացման հիմնական ուղղությունները: Բացի այդ, կառավարությունը պլանավորել է կոնսոլիդացնել փոխադրողներին՝ միջազգային շուկայում նրանց դիրքերն ամրապնդելու համար:
Պաշտոնյան ասել է, որ չինական երեք խոշորագույն ընկերությունները՝ Air China-ն, China Southern Airlines-ը և China Eastern Airlines-ը, դեռևս անհրաժեշտ չափով հզոր չեն միջազգային ուղևորափոխադրողների հետ մրցակցելու համար: Ինչպես նշում է Reuters գործակալությունը, Չինաստանը մտադիր է հարկային արտոնություններ տրամադրել տեղի ավիափոխադրողներին, որպեսզի նրանք կարողանան միջոցները ներդնեն նոր ուղևորաուղիների ստեղծման համար: Կկառուցվեն նաև նոր օդանավակայաններ: 5 տարվա ընթացքում պլանավորվում է կառուցել 45 նոր օդանավակայան, որից հետո դրանց ընդհանուր թիվը կհասնի 220-ի:
Մինչև 2015 թ. Չինաստանի կառավարությունը պլանավորել է նաև կրկնակի ավելացնել ինքնաթիռների քանակը՝ դրանք հասցնելով ավելի քան 5000-ի: Դրանով իշխանությունները ցանկանում են բավարարել ուղևորափոխադրումների աճող պահանջարկը: Օդային փոխադրումների միջազգային ասոցիացիայի (IATA) տվյալներով՝ 2014 թ. ավիաուղևորների թիվը Չինաստանում կգերազանցի 200 մլն-ը:
