Մարդու գիտակցության «սկզբնական կոդին» հասնելու համար նյարդաբանները, որպես կանոն, ուշադրությունը սևեռում են փոքր երեխաների վրա: Երեխայի դեպքում սոցիալական միջավայրով պայմանավորված հմտությունները դեռ զարգացած չեն, այսինքն՝ կան միայն ամենահիմնականները՝ էվոլյուցիայի ընթացքում ձեռքբերվածները, հայտնում է PNAS ամսագիրը:
Նոր հետազոտության շրջանակներում գիտնականները փորձել են հասկանալ մարդու բնազդային վարքը, որի տիպիկ օրինակ է ձեռքը բերանին տանելն ու ձեռքերը մոտեցնելիս բերանը բացելը:
Պրիմատների վրա կատարված փորձերի արդյունքում պարզվել է, որ այդ շարժումների համար պատասխանատու գլխուղեղի հատուկ հատված կա: Ֆրանսիացի գիտնականների հետազոտությանն ուղեղի վիրահատության ժամանակ մասնակցել են մեծահասակ հիվանդներ:
Չնայած փորձի բոլոր մասնակիցներն անգիտակից են եղել, սակայն գրգռելու՝ խթանելու դեպքում 26 մարդուց 9-ը ձեռքերը մոտեցրել են բաց բերանին: Սա հիմք է տալիս մտածելու, որ տվյալ փուլում գործում է էվոլյուցիոն բնազդային արձագանքը:
Հետազոտության հեղինակ Անժելա Սիգիրուն նշում է, որ եթե այդ հմտությունը ձեռքբերովի լիներ, դրա կատարման համար պատասխանատու կլինեին ուղեղի ոչ թե մեկ, այլ միաժամանակ մի քանի գոտիներ:
Մինչ օրս հայտնի չէ, թե ինչով է պայմանավորված այդ բնազդային հմտության ձեռքբերումը, բայց Սիգիրուն և նրա թիմն արդեն աշխատում են այդ ուղղությամբ:
Հետազոտողները նշում են, որ ստացված տվյալները մեծ նշանակություն ունեն մարդու և մարդանման պրիմատների ուղեղի զարգացման մոդելները հասկանալու համար:
