Այսօր՝ սեպտեմբերի 13-ին, Ազգային ժողովում շարունակվում են աշխատանքները: Այժմ քննարկվում է «Լուսավոր Հայաստան» խմբակցության կողմից ներկայացված՝ ԱԺ Կանոնակարգ սահմանադրական օրենքում փոփոխություններ և լրացումներ կատարելու մասին հարցը:
«Մի՛ ջղայնացեք: Չեմ հասկանում, թե ինչու եք սվիններով ընդունում այս նախագիծը, որովհետև այն միտված է ընդհանուր խորհրդարանի աշխատանքի արդյունավետության բարձրացմանը»,- իր ելույթում հայտարարեց պատգամավոր Արման Բաբաջանյանը:
Նա նշեց, որ ինքն ուսումնասիրել է աշխարհի բոլոր խորհրդարանները, այդ թվում նաև հարևան երկրի, որտեղ գործող բոլոր մշտական հանձնաժողովներն ունեն ռազմավարական պլան:
«Տարվա սկզբից պետք է իմանանք, թե ինչ ուղղությունների վրա ենք շեշտադրելու մեր աշխատանքը և այդ ուղղությամբ ռազմավարական պլանավորմամբ կատարենք մեր աշխատանքը»,- նշեց պատգամավորը:
Արման Բաբաջանյանն ընդգծեց. «Ո՞վ է այստեղ կառավարության ներկայացուցչի անձնական կարծիք հաշվի առնում, երբ սա վերաբերում է բացառապես մեր ներքին հարցին: Եվ ընդհանրապես՝ շարունակում է մնալ այն ստերեոտիպը, որ մենք այստեղ կառավարության օրինագծերի դակողն ենք: Այս նախաձեռնությամբ մենք կարող ենք այդ ստերեոտիպը վերացնել, որովհետև այդպիսի պլանավորումը արմատապես փոխում է Ազգային ժողովի որակը»:
Նրա խոսքով՝ մեր հանձնաժողովների նախագահները պիտի հավասարազոր լինեն նախարարներին. «Այսինքն՝ այդքան կարևոր պիտի լինի նրանց կատարած աշխատանքը, և այս նախագիծը եթե ոչ՝ այսօր, ապա վաղվա համար դնում է ինստիտուցիոնալ հիմքեր, որպեսզի մենք կարողանանք բարձր մակարդակի վրա դնել մեր հանձնաժողովների աշխատանքը, նրանց նշանակությունն ու արժեքը»:
Մանրամասները՝ տեսանյութում:
