ԱՄՆ նախագահ Դոնալդ Թրամփը չի հավատում, որ Իսրայելը գաղտնալսող սարք է տեղադրել Սպիտակ տան մոտ։ Այս մասին նա հինգշաբթի օրը Վաշինգտոնում հայտարարել է լրագրողներին։
«Ես չեմ կարծում, թե Իսրայելը լրտեսել է մեզ։ Ինձ դժվար է դրան հավատալը, – ասել է նա։ — Իսրայելի հետ իմ հարաբերությունները հիանալի են։ Նայեք ԱՄՆ որոշումները Գոլանի հարցով, Երուսաղեմի հարցով, ուր մենք տեղափոխեցինք դեսպանատունը»։
«Ուշադրություն դարձրեք նույնիսկ իրանական գործարքին, Իրանին, որը վերջին երկու տարիների ընթացքում ուրիշ երկիր է դարձել։ Ամեն բան հնարավոր է, բայց ես այդ պատմությանը չեմ հավատում»,– նշել է Թրամփը։
Politico թերթը հինգշաբթի օրը հոդված էր հրապարակել, որտեղ նշվում էր, որ ամերիկյան իշխանությունները կասկածում են Իսրայելին՝ Սպիտակ տան մոտ հետևող սարքեր տեղադրելու և հեռախոսները գաղտնալսելու մեջ։ Վարչապետ Բենյամին Նեթանյահուն հրապարակումը բացարձակ ստահոդ էր անվանել։
