Լիբանանցի նախկին նախարար Վիամ Վահաբը, որը հայտնի է սիրիական իշխանությունների և «Հիզբոլահի» հետ իր սերտ կապերով, հայտարարել է, որ «եթե ՆԱՏՕ-ի ուժերը ներխուժեն Սիրիա, ապա Իսրայելի տարածքի վրա միաժամանակ բաց կթողնվի 1000 հրթիռ»: Այս մասին հաղորդում է MIGNews.com կայքը:
Նախկին նախարարի խոսքերով՝ արևմտյան ուժերի ներխուժումը Սիրիա ավելի մեծ վնաս կհասցնի Իսրայելին, քան բուն Սիրիային,- քաղաքական գործչին ցիտում է տեղի Al-Safir թերթը: Հիշեցնենք, որ ավելի վաղ ԱՄՆ պետքարտուղար Հիլարի Քլինթոնը հայտարարել է, որ «սիրիական իշխանություններն անցնում են բոլոր սահմանները, և մոտակա ժամանակներում նրանք արդեն գործ կունենան ավելի կազմակերպված ընդդիմության հետ»: «Այս ամենը տեղի կունենա, եթե Սիրիան հրաժարվի բարեփոխումներ իրականացնելուց»,- ավելացրել է Քլինթոնը:
Ելույթ ունենալով մամուլի ասուլիսի ժամանակ՝ պետքարտուղարը նաև հայտարարել է, որ ինքը «հիասթափված է բռնության մասին նոր տեղեկություններ լսելով, որոնք տեղի են ունեցել վերջին օրերին», և որ «սիրիական իշխանությունների որոշումը՝ Դամասկոսում ընդդիմության մեկ հանրահավաքը թույլատրելու վերաբերյալ, միանշանակորեն քիչ է»: