Վրացական GHN լրատվական գործակալության փոխանցմամբ՝ Эхо Москвы ռադիոկայանին տված հարցազրույցում Վրաստանի նախագահ Միխեիլ Սաակաշվիլին հայտարարել է, որ Վրաստանի դեմ գործողությունները պլանավորում է անձամբ Պուտինը։
Սաակաշվիլին վստահեցրել է, որ բազմիցս տեսել ու լսել է, որ Ռուսաստանի վարչապետ, անվտանգության դաշնային ծառայության պահեստազորի փոխգնդապետ Պուտինն անձամբ պլանավորում է Վրաստանի դեմ ուղղված հետախուզական գործողությունները, ընդ որում՝ այն աստիճան ներգրավվելով տվյալ գործընթացի մեջ, որ անգամ գիտե օպերների ազգանունները։
«Պուտինը մեծ հաճույք է ստանում նրանից, որ պլանավորում է այդ ամենը։ Այնպես որ, եթե այժմ որևէ երկիր համարվում է այդ խաղերի հիմնական դաշտ, ապա դա մենք ենք։
Ինչ վերաբերում է իմ անձնական լուսանկարչին, ապա ես մեծապես հիասթափված եմ, սակայն իմ անձնական զգացմունքներն այստեղ մղվում են երկրորդ պլան»։
Սաակաշվիլիի խոսքերով՝ ռուսական հատուկ ծառայություններն իր երկրի համար պատրաստել են «հյուսիսաֆրիկյան սցենարներ»։
Հիշեցնենք, որ նույն հարցազրույցի ժամանակ Սաակաշվիլին հայտարարել էր. «Ռուսական կառավարությունը պաշտոնապես չի ճանաչում մեր կառավարությունը, մեր սահմանները, անգամ պաշտոնապես չի ճանաչում զինադադարի համաձայնագիրը՝ էլ չխոսենք խաղաղության որևէ հնարավոր պայմանագրի մասին։
Ավելին՝ ռուսական իշխանությունների ներկայացուցիչները բավական լուրջ մակարդակներում դադարել են մեզ երկիր անվանելուց՝ փոխարենն անվանելով «տարածքային-էթնիկ միավոր»։ Դա խորհրդային ժամանակաշրջանի քաջածանոթ տերմին է»։
