ԱԺ «Ժառանգություն» խմբակցության ղեկավար Ռուբիկ Հակոբյանն իր ելույթից առաջ ելույթ ունեցած պատգամավորի՝ ՀՀԿ խմբակցության ղեկավար Գալուստ Սահակյանի ելույթը հաճույքով է լսել, սակայն կարծում է՝ քննարկումը շահագրգիռ էր, բայց ոչ՝ բովանդակային: Մարտի 25-ին ԱԺ նիստում նա, դիմելով Սահակյանին, նշեց, որ իսկապես հրաշալի էր, սակայն խորհուրդ կտար միշտ կարդալով խոսել ու մեջբերել միայն Թումանյանի ստեղծագործությունները։
Հակոբյանը նշեց, թե դասեր են տալիս ընդդիմությանը, ասում՝ որն է դասական ընդդիմությունը, ապա խորհուրդ տվեց՝ եթե իրենք լավ ընդդիմություն չեն, թող իշխանությունը դուրս գա, իր օրինակով ցույց տա՝ ինչպիսին պետք է լինի լավ ընդդիմությունը:
Անդրադառնալով տեսակետին, թե ընդդիմությունն ամեն ինչ սևացնում է կամ սև ակնոցներով է տեսնում, խմբակցության ղեկավարը նշեց, որ դա քաղաքական կուրություն է: «Ո՞վ ասաց: Եթե մենք ասում ենք՝ Մարտի 1-ը պետք է բացահայտվի, 300 մլն դոլարի պարտքը չպետք է ժողովրդի վզին դրվի, որ ասում ենք՝ պետք է կուտակային ֆոնդի հետ կապված հանձնաժողով ձևավորել, սևացնո՞ւմ ենք։ Միգուցե դո՞ւք եք վարդագույն ակնոց դրել և ուզում եք իշխանության բոլոր քայլերը դրական ներկայացնել՝ անկախ ձևակերպումներից։
Եվ ընդհանրապես, ընդդիմությանը դասեր մի՛ տվեք, երբ կյանքում 10 րոպե չեք եղել ընդդիմությունում։ Զգո՛ւյշ եղեք»,- ասաց նա՝ խորհուրդ տալով դասախոսություններ կարդալուց առաջ հասկանալ՝ ինչ է ընդդիմությունը։
«Ժառանգության» խմբակցության ղեկավարը նշեց, որ խորհրդարանական ոչ իշխանական ուժերը քննարկել են ԱԺ նախագահի առաջարկը՝ լսումներ անցկացնելու վերաբերյալ, և համաձայնության եկել։ Նա առաջարկեց չորս ուժերի ներկայացրած նախագծի (ժամանակավոր հանձնաժողովի ստեղծման) քվեարկությունը հետաձգել, տեղափոխել ապրիլի 28, իսկ մինչ այդ միասին համապատասխան օրակարգ ձևավորելով՝ կազմակերպել լսումներ և հուսալ, որ դրանք դրական արդյունքներ կտան։
ԱԺ նախագահ Հովիկ Աբրահամյանը համաձայնեց քվեարկությունը կազմակերպել հաջորդ քառօրյային՝ լսումներից հետո։
