ԱՄՆ-ի նախագահ Դոնալդ Թրամփն արգելապատի կառուցում է սկսել ոչ միայն ամերիկա-մեքսիկական սահմանին, այլև Վաշինգտոնում սեփական նստավայրի՝ Սպիտակ տան շուրջը: Փենսիլվանիա ավենյուի երկայնքով արգելապատնեշի հատվածը, որտեղից բացվում է այդ տեսարժան վայրի՝ ամենահայտնի և զբոսաշրջիկների կողմից սիրված տեսարանը, փակել են սպիտակ գույնի շինարարական հոծ ցանկապատով:
Գեղեցկության համար ցանկապատը պատված է սպիտակ գործվածքով, որի վրա զետեղված են նախագծի որոշ մանրամասներ, ինչպես նաև արխիվային պատկերներ, թե ինչ տեսք է ունեցել Սպիտակ տունը նախորդ ժամանակաշրջաններում:
Զբոսայգիների ազգային ծառայության կայքում նկարագրված պլանների համաձայն՝ մոտավորապես 2 մետր բարձրությամբ ներկայիս պարիսպը կփոխարինեն կրկնակի բարձր պարսպով: Շուրջ 13 ֆուտ (գրեթե 4 մետր) բարձրությամբ նոր արգելապատը կկառուցվի իրավազանցների հայտնաբերման տեխնոլոգիայի կիրառմամբ և այնպես, որ դրա վրա գործնականում հնարավոր չլինի բարձրանալ:
ԱՄՆ-ի նախագահի վաշինգտոնյան նստավայրի պարիսպն ավելի բարձր դարձնելու մտադրությունները հայտնվել են մի շարք աղմկահարույց միջադեպերից հետո, որոնք կապված են Փենսիլվանիա ավենյու, 1600-ում գտնվող համալիրի պահպանվող տարածք կողմնակի անձանց չարտոնված ներթափանցման հետ, հաղորդել է ՏԱՍՍ-ը:
