ԱՄՆ պետքարտուղար Մայք Փոմփեոն հայտարարել է, որ ինքը ցանկացել է Թեհրան այցելել և «ուղղակիորեն խոսել իրանցի ժողովրդի հետ»։ Այս մասին նա հայտնել է Twitter-ում։
Սակայն նրա խոսքով՝ Իրանի իշխանությունները մերժել են իրեն և չեն ցանկացել իրենց երկրում ընդունել։
«Ռեժիմը չի ընդունել իմ առաջարկը»,-նշել է Փոմփեոն։
Նա հավելել է, որ Իրանի ԱԳ նախարար Մոհամադ Ջավադ Զարիֆը հաճախ է ԱՄՆ-ում լինում, որտեղ կարող է «ազատ խոսել»։ Դրա հետ կապված՝ Փոմփեոն զարմանք է հայտնել, որ պետության ղեկավար Ալի Խամենեին իր համար միևնույն բանն անել չի կարող։
Նա նշել է, որ հնարավոր է՝ Իրանի առաջնորդը վախենում է, որ իր ժողովուրդը կլսի «չֆիլտրացված և չկրճատված» ճշմարտությունը։
