ԱԺ ՀԱԿ խմբակցության պատգամավոր Նիկոլ Փաշինյանի համոզմամբ՝ տեսանկարահանող սարքերի գործարկման հետևանքով ՀՀ քաղաքացիների ուսերին դրվել է տասներկու միլիարդ դրամի լրացուցիչ ֆինանսական բեռ: Պատգամավորի խոսքերով՝ սա այն գումարն է, որ մարդիկ նախկինում օգտագործում էին ընտանիքի կարիքները հոգալու համար, հիմա ստիպված են կրճատել այդ ծախսերը և վճարել տեսախցիկների արձանագրած խախտումների համար: Փաշինյանը նկատեց, որ սա արդյունավետ միջոց չէ. քանի որ եթե նախկինում պետավտոտեսուչները առձեռն էին վերցնում գումարը, ապա այնպես չէ, որ այդ գումարը բացահայտվել է, և այլևս չեն վերցնում:
«Տիկնայք և պարոնայք, կառավարության անդամներ, պետավտոտեսուչները, ինչպես նախկինում, այնպես էլ հիմա էլ նույն գումարները վերցնում են, եթե ձեզ թվում է, թե այդ մասին ՀՀ քաղաքացիները չգիտեն` դուք չարաչար սխալվում եք: Եթե կոռոպցիայի դեմ պայքար է, ապա շատ վատ պայքար է, որովհետև ամենակոռումպացված պետավտոտեսուչին կարելի է բացատրել, ամենակոռումպացված պետավտոտեսուչը չի տուգանի վարորդին, որ նրա մեքենայի անվադողը շոշափել է հոծ գիծը, բայց այսօր ամենածիծաղելի խախտումների համար մարդիկ ենթարկվում են աստղաբաշխական տուգանքների… Պետավտոտեսուչին կարելի է բացատրել, որովհետև մարդիկ տեսնում և հասկանում են, իսկ ձեր արագաչափ սարքերը տեսնում են, բայց չեն հասկանում»,- ընդգծեց Փաշինյանը, ապա ներկայացրեց ՃՈ արձանագրած մահվան դեպքերի վիճակագրությունը, որը փաստում է՝ 2010 թ., երբ տեսանկարահանող սարքեր չկային, պատահարների հետևանքով զոհվել է 294 մարդ, իսկ 2013-ին, երբ արդեն կային տեսանկարահանող սարքեր` 316 մարդ:
Պատգամավորը շեշտեց՝ ոչ ոք չի ասում` խախտումը չպիտի տուգանվի, պարզապես պետք է հստակեցնել՝ ցանկանում են խախտումնե՞րը նվազել, թե˚ որոգայթներ լարել վարորդների համար:
«Այս դահլիճոմ գտնողների 99%-ը, չեմ ուզում ասել 100%-ը, որպեսզի դալիճում գտնվող ներկաների համար մեկ տոկոսի ալիբի ապահովեմ, 99,9%-ը համոզված է, որ արագաչափերի ընկերության հետևում կանգնած է Սերժ Սարգսյանի եղբայր Ալեքսանդր Սարգսյանը։ Ասում եք` ո՞ւր ա գնում գումարները, ո՞ւր ա գնում… Սերժ Սարգսյանի ընտանիքին է գնում։
Նախկինում հանրային գիտակցության մեջ Սերժ Սարգսյանի եղբայրը ընկալվում էր որպես սրա-նրա բիզնեսների մեջ փայ մտնող, հիմա ինքը փաստացի յուրաքանչյուր վարորդի ընտանեկան բյուջեի մեջ ա փայ մտնում… Ուզեք չուզեք` փաստը մնում է փաստ»,- ասաց նա:
Փաշինյանը վստահ է՝ պետք է վետո դնել նոր արագաչափերի տեղադրմանը, տուգանքների չափը 2-10 անգամ պիտի նվազի, և, առհասարակ, արագաչափերը պետք է հանվեն ՀՀ ավտոճանապարհներից:
