«Քաղբանտարկյալների խնդիրները պետք է մարեն, քանի որ բանտերում այլևս քաղբանտարկյալներ չկան, ուստի բնական է, որ այդ մասին այլևս շատ չեն գրում և չեն խոսում»,- «Առաջին լրատվական»-ի հետ զրույցում ասաց իրավապաշտպան Վարդան Հարությունյանը և հավելեց՝ քաղբանտարկյալ ունենալը ամոթալի երևույթ է աշխարհի ցանկացած պետության համար:
Նրա խոսքով՝ այժմ Հայաստանում չկան քաղբանտարկյալներ, սակայն կա մի հոծ զանգված, որոնք տարիներ շարունակ իրենց քաղաքական գործունեության, քաղաքական ակտիվության հետևանքով հայտնվել էին կալանավայրերում. «Եվ հիմա նոր Հայաստանը պետք է ձեռնամուխ լինի այդ քաղբանտարկյալների արդարացման գործին, որովհետև ժողովրդավարական զարգացումների թիվ մեկ գրավականը նախկին ռեժիմի քաղբանտարկյալների արդարացումն է. պետք է օրենքով ցույց տրվի, որ մենք խզում ենք մեր կապը անցյալի հետ: Մեր հեղափոխությունը հենց սրա՛ համար էր, որպեսզի քաղբանտարկյալներն արդարացվեն, և մենք հետագայում քաղբանտարկյալներ չունենանք»:
Իրավապաշտպանն ընդգծեց՝ այդ խնդիրը քաղբանտարկյալներինը չէ. «Քաղբանտարկյալները չէ, որ պետք է զբաղվեն իրենց արդարացման գործով՝ դրանով պետք է զբաղվի պետությունը: Հակառակ դեպքում մենք շարունակելու ենք մտածել, որ դեռ ունենք քաղբանտարկյալ՝ բանտում չեն նրանք, բայց դեռ դատապարտված են: ՀՀ վարչապետը նույնպես քաղբանտարկյալ է եղել, և պատկերացրեք՝ ՀՀ վարչապետը դատապարտված անձ է»:
Հարցազրույցն ամբողջությամբ՝ տեսանյութում:
