Ինչպես հաղորդում է Սիրիայի մարդու իրավունքների դիտորդական կենտրոնի ղեկավար Ռամի Աբդ Ալ-Ռահմանը, երեկ ուրբաթօրյա աղոթքից հետո Սիրիայի քաղաքների փողոցներ են դուրս եկել մինչև կես միլիոն մարդ:
Ամենազանգվածային բողոքի ակցիաները եղել են Համա քաղաքում, որտեղ հակակառավարական ցույցերին մասնակցել են տասնյակ հազարավոր մարդիկ: Կազմակերպիչները կոչ են արել անհամաձայնություն հայտնել և անընդունելի համարել իշխանությունների կողմից այս կիրակի նախաձեռնվող խաղաղ բանակցություններն ընդդիմության հետ: Ինչպես հաղորդում է BBC-ն, հարակից գյուղերի հազարավոր բնակիչների զինված ուժերն արգելել են դուրս գալ ցույցերի:
Հայտնի է, որ այդ ցույցին մասնակցել են նաև ԱՄՆ և Ֆրանսիայի դեսպանները, որոնք իրենց համերաշխությունն են հայտնել բողոքի դուրս եկած սիրիացիներին, ինչը հարուցել է պաշտոնական Դամասկոսի բուռն զայրույթը:
Ռամի Աբդ Ալ-Ռահմանը նաև ասել է, որ երեկ օրվա ընթացքում երկրի տարբեր քաղաքներում սպանվել է 13 ցուցարար:
