News Georgia-ի փոխանցմամբ՝ Վրաստանի 6 ընդդիմադիր կուսակցություններ՝ այսպես կոչված ընդդիմադիր «վեցնյակը», ձևավորել են «Ազատ ընտրություն» քաղաքական կոալիցիան։ Վերջինս պայքարելու է Վրաստանում իշխանափոխության իրականացմանը միտված արդար ընտրությունների անցկացման համար։
«Ազատ ընտրություն» քաղաքական կոալիցիայի շնորհանդեսը կայացել է այսօր Թբիլիսիում։ Նրա ներկայացուցիչներն իրենց համակիրներին ու լրագրողներին ներկայացրել են իրենց հետագա գործողությունների պլանները.
«Երկրում առաջացած նոր իրավիճակը մեզ կանգնեցրեց նոր մարտահրավերների առջև։ Նոր առաջադրանքներն ու նպատակները պահանջում են քաղաքական կուսակցությունների միջև ավելի բարձրորակ փոխհարաբերություններ, ինչի համար էլ մենք՝ 6 ընդդիմադիր կուսակցություններս, միավորվեցինք «Ազատ ընտրություն» նոր քաղաքական կոալիցիայի մեջ»։
Հիշեցնենք, որ վրացական ընդդիմադիր «վեցնյակում» ներկայացված են «Վրաստանի ուղի», «Մեր Վրաստան – Ազատ դեմոկրատներ», «Պահպանողական» կուսակցությունը, «Հանրապետական» կուսակցությունը, «Ժողովրդի» կուսակցությունը և Ազգային ֆորումը։
Այս քաղաքական կառույցները, «Նոր աջեր»-ի և «Քրիստոնեա-դեմոկրատական» շարժման հետ միասին, ժամանակին կազմում էին վրացական ընդդիմադիր «ութնյակը», որը պայքարում էր ընտրական միջավայրի բարելավման համար և 2010 թվականի հոկտեմբերից համապատասխան բանակցություններ էր վարում իշխանությունների հետ։
