Հայաստանի ուղևորափոխադրող ընկերությունները մարտի 4-ին դարձյալ դիմել են քաղաքապետարան՝ նշելով, որ այլևս հնարավոր չէ աշխատել, ընկերություններ կան, որոնք անգամ լուծարվել են, որոշ ընկերություններ էլ սնանկության գործընթացի մեջ են, բայց բոլորը մի ցավ ունեն՝ մեծ վնասներ են կրում ստեղծված իրավիճակի պատճառով, ասում, որ 100 դրամով ուղևորափոխադրում իրականացնելն անհնար է:
Մարտի 22-ին լրագրողների հետ հանդիպմանը Հայաստանի ուղևորափոխադրողների միության նախագահ Հրանտ Եղիազարյանը նշեց, որ ամբողջ ձմեռ տուժելով ուղևորափոխադրում են իրականացրել, հիմա եկել հասել են այն վտանգավոր գծին, երբ 23 չսպասարկվող երթուղիներին է ավելացել ևս 7-ը, քանի որ այդքան մեքենա չեն կարողանում երթուղի դուրս բերել: «Այս վիճակը վտանգավոր հետևանքներ կարող է ունենալ: Մենք դիմեցինք նախագահին, վարչապետին և քաղաքապետին՝ նամակում նշելով, որ այս իրավիճակը շարունակվել չի կարող, հանձնաժողովն անհասկանալի պատճառներով նիստ չի գումարում. կարծես թե լսեցին, ապրիլի 4-ին կգումարվի հերթական նիստը, կարծում ենք՝ այդ ժամանակ մեզ կասեն, թե ինչ թվերի վրա են դուրս եկել, թե որքան է ուղևորահոսքը Երևանում: Ուսումնասիրություններ էին կատարում՝ դա պարզելու համար, մինչդեռ մենք կարծում ենք՝ ավելի կարճ ճանապարհ կար՝ փոխադրողներին հարցնել, թե որքան ուղևոր են փոխադրում»,- ասաց նա:
Եղիազարյանը նշեց, որ իրենք ցանկանում են՝ 150 դրամ վճարեն ուղևորները, և իրենց հիսուն դրամ դոտացիա տան, ընդ որում՝ ցանկանում են ոչ թե իրենց կամ քաղաքապետարանի ուզածը ասեն, այլ անկախ հաշվարկային հանձնաժողովի նշած թիվը: «Արշակյան եղբայրներ» ընկերությունը, Եղիազարյանի խոսքով, արդեն սնանկ է ճանաչվել:
39 համարի միկրոավտոբուսային երթուղին սպասարկող Պատվական Միհրանյանը նշեց, որ անվճար փոխադրվող ուղևորների դիմաց իշխանությունը տասը տոկոս պիտի վճարի իրենց: Նա նաև տեղեկացրեց, որ այսօր բոլոր «ԳԱԶել» տիպի միկրոավտոբուսները քաղաքապետարանի որոշմամբ փոխվում են ավտոբուսներով:
Լրագրողների հետ հանդիպմանը ներկա էր նաև 37 և 4 ավտոբուսային երթուղիները սպասարկող Լյուդվիգ Պողոսյանը, ով նշեց՝ արդեն իսկ իր 4 ավտոբուսային երթուղին փակվել է: Նա տեղեկացրեց, որ ստիպված է աշխատում՝ բանկից վերցրած վարկը մարելու համար:
