«Ժողովրդագրական խնդիրը ազգային անվտանգության, եթե չասեմ՝ ազգապահպանման խնդիր է: Դա ամենասուր հարցն է, և կարծես միայն վերջին տարիներին են սկսել անհանգստանալ այս հարցով: Հիմա կարծես կա կոնսենսուս, որ բոլոր հարցերը կլուծվեն, եթե երկրում սոցիալ-տնտեսական վիճակը լինի բարվոք: Մարդիկ տեսնում են իրենց ապագան այս երկրում, և դա համապատասխանաբար կազդի դեմոգրաֆիայի վրա»,- «Առաջին լրատվական»-ի հետ զրույցում ասաց քաղտեխնոլոգ-վերլուծաբան Վիգեն Հակոբյանը՝ անդրադառնալով «Սմարթ» մանկական կենտրոնում վարչապետ Նիկոլ Փաշինյանի ելույթին:
Վերլուծաբանի խոսքով՝ առայժմ հստակ ծրագիր կարծես չի հրապարակվել. «Այնուամենայնիվ, ասել, որ դեմոգրաֆիայի ուղղությամբ ոչինչ չի արվել՝ չի կարելի: Ասվում է, որ թոշակներն են բարձրանալու, բարձրանալու է նաև պետական ծառայողների աշխատավարձը. սրանք քայլերից մեկն են, որովհետև պետք է փորձել մարդկանց պահել երկրում: Սակայն ամենամեծ պրոբլեմն այն է, թե արդյոք պահպանվելո՞ւ է վստահության կրեդիտը, որովհետև մարդիկ այդ մասին նախկինում շատ են լսել»:
Անդրադառնալով Հայաստանից մարդկանց արտագաղթի թեմային՝ քաղաքագետ Էդգար Վարդանյանը կարևորեց իներցիայի գործոնը և հավելեց, որ դրանով մարդիկ դեռևս գնահատական են տալիս նախկին իշխանություններին, նրանց կողմից իրականացված գործողություններին և այդ գործողությունների հետևանքներին. «Հիմա շատերի մեջ է հույս արթնացել, ապագայի նկատմամբ սկսել են ավելի դրական վերաբերվել, բայց միևնույն է՝ հոսք կա, որովհետև նախկինի հետ կապված հետևանքները դեռս չեն վերացել»:
Քաղաքագետը նշեց՝ այժմ փորձագիտական մակարդակով մշակվում է միգրացիոն քաղաքականության վերաբերյալ հայեցակարգ. «Դրանից հետո մենք կկարողանանք խոսել այս ոլորտում հստակ ռազմավարության մասին: Այնուամենայնիվ, որքան էլ Հայաստանում աշխատավարձեր բարձրացվեն, աշխատատեղեր ստեղծվեն, կլինեն որոշակի տոկոսով մարդիկ, որ միևնույն է՝ կլքեն Հայաստանը: Խնդիրն այն է, թե արտագաղթի որքան տոկոսն է կատաստրոֆիկ երկրի համար. այդ սահմանը պետք է վերլուծվի և նշվի»:
Հարցազրույցն ամբողջությամբ՝ տեսանյութում:
