«Արմավիրի մարզում շատ ցավալի պատկեր է։ Արմավիրի մարզը տարիներ շարունակ հանրապետությունում իր ցուցանիշներով եղել է ամենավերջինը։ Շատ քիչ ծրագրեր են իրականացվել»,- «Առաջին լրատվական»-ի հետ զրույցում ասաց մարզպետը՝ հավելելով, որ ներկայումս կոնկրետ խնդիր են դրել փոխել պատկերը։ Արդեն իսկ կառավարություն ներկայացրել են 45 սուբվենցիոն ծրագիր, որոնցից առնվազն 40-ը հնարավոր է կյանքի կոչել։ Իսկ ծրագրերը բազմազան են՝ ճանապարհաշինություն, բնակֆոնդի վերանայում, գյուղատնտեսություն, մանկապարտեզների ու դպրոցների նորոգում, ոռոգման համակարգերի բարելավում։ «Համեմատականի համար ասեմ, որ խոսք է գնում 300 տոկոս աճի մասին ծրագրերի մասով, որը Արմավիրի մարզի համար աննախադեպ է։ Էլ չեմ խոսում, որ մենք հրատապություն պահանջող խնդիրների մասով ունենք մոտ 20 հրատապ ծրագիր։ Այս տարի նախատեսվում է մոտ 100 ծրագիր իրականացնել և եթե այս տեմպերով շարունակենք՝ Արմավիրում այլևս կենսական նշանակության խնդիրների լուծման համար ծրագրեր չենք բերի։ Մեր բոլոր ծրագրերը լինելու են արդեն առաջընթաց ապահովելու համար»,- ասաց մարզպետը։
Մաթևոսյանը խոսեց նաև ՋՕ-ներից։ Մարզում գործող 3 ՋՕ-ներից երկուսը դիմում են գրել, հեռացել են, լուրջ վարչական ստուգումեր են եղել, որոնց արդյունքում ահռելի՝ միլիարդավոր դրամների հասնող չարաշահումներ են հայտնաբերվել, հարուցվել են քրեական գործեր։ «Ստուգումները օգնում են, և մենք քաղաքական կամք ունենք սահմանելու օրենքի գերակայություն և բացառելու հետագա չարաշահումները»,- ասաց Մաթևոսյանը։
Մաթևոսյանը նշեց, որ Արմավիրի մազում մեկնարկում է խոշորացման գործընթաց, այս պահին իրականացվում են հանրային քննարկումներ, իրազեկման աշխատանքներ։ Մարզպետը նշեց, որ իր հանդիպումները ցույց են տալիս, որ մարզում բնակիչները տեղյակ չեն խոշորացման գործընթացից, ծրագրի լավ կողմերից։ Հետևաբար, իրենք նախատեսում են ակտիվ իրազեկման աշխատանքներ տանել, հանրային քննարկումներ կազմակերպել, և համայնքների խոշորացումը պետք է տեղի ունենա բնակիչների ակտիվ մասնակցությամբ։
Առավել մանրամասն՝ տեսանյութում։
