«Ոսկե ծիրան» երևանյան 8-րդ կինոփառատոնի այս տարվա գլխավոր անակնկալը աշխարհահռչակ Ֆանի Արդանի այցն է: Ֆանի Արդանը կիրակի օրը հանդիպում կունենա հայ հանդիսատեսի հետ: Այս մասին հայտնում է փառատոնի տնօրեն Հարություն Խաչատրյանը։
Հուլիսի 11-ի երեկոյան «Մոսկվա» կինոթատրոնում կցուցադրվեն Ֆանի Արդան ռեժիսորի նկարահանած երկու ֆիլմերը՝ «Մոխիր և արյուն»-ն ու կարճամետրաժ «Բացակա երազներ»-ը:
Երևանյան պրեմիերաների շարքում այս տարի «Ոսկե ծիրան»-ը կներկայացնի Կաննի կինոփառատոնի 3 մրցանակակիրներին՝ Թերենս Մալիքի «Կենաց ծառը», Նուրի Բիլգե Զեյլանի «Մի անգամ Անատոլիայում»-ը, Լարս ֆոն Թրիերի «Մելանխոլիա»-ն:
Այս տարի մրցանակներ են շնորհվելու Բելա Տարին և Ռոման Բալայանին։ Կա նաև «Վարպետ» կոչվող մրցանակը, որը տրվում է վարպետությամբ փայլող ռեժիսորներին, որոնք միջազգային ճանաչում դեռ չունեն։
Հիշեցնենք, որ «Ոսկե ծիրանի» օրերին նախատեսվում էր բացել Մանթաշովի արձանը, սակայն տեղի հատկացման հետ կապված խնդիրների պատճառով արձանի բացումը տեղի կունենա մեկ ամսից։
Կազմակերպիչները այս տարի շատ կարևոր են համարում ԱՊՀ երկրներից ներկայացուցիչների մասնակցությունը «Ոսկե ծիրանին»։ «Մենք ուզում ենք, որ «Ոսկե ծիրանը» դառնա տարածաշրջանի ամենակարևոր փառատոնը։ Այս առումով՝ կարևոր է ԱՊՀ-ից մասնակիցների ծրագիրը»,- ասում է փառատոնի տնօրեն Սուսաննա Հարությունյանը։
Այս տարի փառատոնի ֆիլմերի մուտքի տոմսը թանկացել է՝ 300-ի փոխարեն տոմսի արժեքը լինելու է 500 դրամ։