Սիրիայի կրթության ոլորտը մեծ կորուստներ է կրել ճգնաժամի հետևանքով, որը երկրում շարունակվում է արդեն երեք տարի: Այս մասին հայտարարել է Սիրիայի նախագահ Բաշար Ասադը Դամասկոսում ուսուցիչների պատվիրակության հետ հանդիպման ժամանակ՝ փոխանցում է ITAR-TASS-ը:
Նրա խոսքով՝ սիրիացիները պատերազմ են մղում խավարամիտ ուժերի դեմ: «Նրանք, ովքեր հարձակվում են դպրոցների և ուսուցիչների վրա և զրկում երիտասարդ սերնդին գիտելիք ստանալու հնարավորությունից, ցույց են տալիս իրենց իրական դեմքը»,- հայտարարել է նախագահը:
Ասադի խոսքով՝ այդ ուժերը ձգտում են սիրիական հասարակությանը հետ շպրտել և խոչընդոտում են առաջընթացին: Նախագահն իր հարգանքն է հայտնել խիզախ ուսուցիչներին, ովքեր շարունակում են ծառայել լուսավորման մարդասիրական նպատակներին՝ ռիսկի ենթարկելով իրենց կյանքը:
«Սիրիական հասարակության բոլոր շերտերի ամրությունը, հատկապես ուսուցիչների, Սիրիայի փրկության կարևորագույն գործոններից մեկն է»,- նշել է նա:
Ասադը կնոջ՝ Ասմայի հետ շնորհավորել է կրթական համակարգի աշխատակիցներին՝ նրանց մասնագիտական տոնի առթիվ, որը երկրում նշվում է այսօր:
