Ադրբեջանում պրոռուսական ուղղությունը պարտվել է: Այսօր «ՆԱՏՕ և Հարավային Կովկաս՝ ռազմավարական մոտեցումներ տարածաշրջանի անվտանգությանը» միջազգային կոնֆերանսի ընթացքում այս մասին ասաց Ադրբեջանի Խաղաղության և ժողովրդավարության ինստիտուտի Հակամարտությունների և միգրացիայի բաժնի ղեկավար, քաղաքագետ, ադրբեջանցի կոնֆլիկտոլոգ Արիֆ Յունուսովը:
Նա նշեց, որ իրականում ԼՂ հակամարտության գործոն լինելու մասին խոսում են տարածաշրջանից դուրս, այնինչ, որքան էլ որ տարօրինակ հնչի, ԼՂ հակամարտությունն այնքան էլ կարևոր գործոն չէ, քանի որ վաղուց վերածվել է սառեցված հակամարտության, այսինքն՝ 20 տարի ընթանում են բանակցություններ, բոլորը հիանալի հասկանում են, որ ևս 20 տարի դրանք կշարունակվեն, իսկ ամենակարևոր արդյունքը չի լինի:
«Մենք ինքներս ենք շատ հաճախ ԵԱՀԿ Մինսկի խմբի միջնորդներին անվանում զբոսաշրջիկներ, որոնք գալիս են, ինչ-որ բան են ասում, հանդիպում են: Մենք հասկանում ենք՝ ոչ պատերազմ, ոչ խաղաղություն վիճակը ձեռնտու է կողմերին և մասնավորապես ներքին սպառման համար»,- ասաց նա:
Վերջին զարգացումներից հետո, ըստ նրա, Ղրիմը դարձել է Ղարաբաղի հոմանիշը, ուստի Ադրբեջանում երեք ուղղություններից պրոռուսականը պարտվել է: Նրա խոսքով, եթե նախկինում կային մարդիկ, ովքեր խոսում էին ՄՄ-ին հնարավոր անդամակցության մասին, ապա այսօր այդ թեման սառեցվել է, կա վախ ՌԴ-ից, սրանով են պայմանավորված Ադրբեջանի իշխանությունների շատ քայլեր:
Առաջարկում ենք մանրամասներին ծանոթանալ տեսանյութում:
