Արցախի Պաշտպանության բանակի նախկին հրամանատար Սամվել Բաբայանի նախաձեռնած ստորագրահավաքի շուրջ ծավալված իրադարձությունները շարունակում են մնալ Հայաստանի և Արցախի քաղաքական դաշտի ուշադրության կենտրոնում։ Արցախի «ԱԺ կանոնակարգ» օրենքի համաձայն` քաղաքացիների` ստորագրահավաքի արդյունքում ներկայացրած առաջարկը պետք է քննարկվի խորհրդարանի հերթական նիստերում՝ երկու ընթերցմամբ, այդ ընթացքում պետք է ուղարկվի Գերագույն դատարան սահմանադրականությունը որոշելու համար: Իսկ Արցախի խորհրդարանի ամենամեծ խմբակցությունը պատկանում է Սամվել Բաբայանի հիմնական մրցակցին՝ Արցախի նախկին վարչապետ Արայիկ Հարությունյանին, ուստի, շատերի կարծիքով՝ դժվար չէ կանխատեսել, թե այն խորհրդարանում ինչ ճակատագիր կունենա։
«Ազատ հայրենիք» կուսակցության խոսնակ Վահրամ Պողոսյանը, սակայն, «Առաջին լրատվական»-ի հետ զրույցում ասաց, որ այժմ իրենք դիրքորոշում չունեն։
Ավելին՝ Պողոսյանը շեշտեց, որ չի բացառվում, որ «Ազատ հայրենիք»-ը կարող է կողմ քվեարկել. «Մենք ասել ենք, որ օրենքի շրջանակներում իրականացվող ցանկացած նախաձեռնություն մենք ընդունում ենք և որևէ խնդիր չենք տեսնում։ Ինչ վերաբերում է կոնկրետ ստորագրահավաքի հետ կապված մեր դիրքորոշմանը՝ դեռ վաղ է այդ մասին խոսելը, սահմանված ժամկետը չի ավարտվել, այսինքն՝ ԿԸՀ չի ուղարկվել։ Պետք է ԿԸՀ-ն եզրակացություն տա, հետո գա խորհրդարան, հետո Գերագույն դատարանը պետք է որոշի դրա սահմանադրականությունը։ Այս պահին մենք դեռ քննարկում չենք ունեցել»։
Վահրամ Պողոսյանն ասաց՝ տեղին չեն այն շահարկումները, թե «Ազատ հայրենիք»-ը միտված է տապալելու այդ գործընթացը. «Ասեմ ավելին՝ եթե հասնի խորհրդարան, չեմ բացառում, որ կարող է կողմ քվեարկենք։ Երբ հասնի խորհրդարան՝ այդ ժամանակ ավելի հստակ դիրքորոշում կհայտնենք, ամեն ինչ կախված կլինի իրադարձությունների ընթացքից»։
Արցախի խորհրդարանի նախագահ Աշոտ Ղուլյանը ևս միանշանակ կարծիք չունի այս ստորագրահավաքի հետ կապված։ Նա նշել է, որ անտրամաբանական է մարդուն օժտել ընտրվելու իրավունքով, միևնույն ժամանակ չանդրադառնալ նրա ընտրելու իրավունքին, այն դեպքում, երբ առհասարակ, առաջադրվելու իրավունքը ծագում է ընտրելու իրավունքից հետո: Իսկ Սամվել Բաբայանը, ինչպես հայտնի է, բարձրացնում է հենց իր ընտրվելու հարցը և, փաստորեն, կոնկրետ իր առաջադրումը հնարավոր դարձնելու համար առաջարկում է սահմանադրական փոփոխություններ իրականացնել։ Բայց այստեղ կա մի ուշագրավ հանգամանք ևս՝ եթե Սամվել Բաբայանին հաջողվի իրականացնել այդ փոփոխությունները՝ ակնհայտորեն ճանապարհ է բացվում նաև այլ գործիչների համար։
Արցախում և Հայաստանում՝ քաղաքական շրջանակներում, այս կոնտեքստում քննարկվում է Ռոբերտ Քոչարյանի անունը, որի առաջադրումը Արցախի գործող Սահմանադրությամբ ևս բացառվում է։
