Երևանում մեկնարկել է «Ոսկե ծիրան» 16-րդ միջազգային կինոփառատոնը: Միջազգային կինոփառատոնն աշխարհի տարբեր երկրներից ստացել է մասնակցության ավելի քան 740 հայտ: «Ոսկե ծիրան»-ը Հայաստան է բերել նաև ֆրանսահայ անվանի կինոռեժիսոր, դերասան, սցենարիստ և պրոդյուսեր Սերժ Ավետիքյանին:
«Առաջին լրատվական»-ի հետ զրույցում Սերժ Ավետիքյանը նշեց, որ փառատոնի բյուջեն այս տարի 50 տոկոսով կրճատվել է. «Ֆիլմեր ենք բերել, աշխատել ենք և կշարունակենք աշխատել: Բայց ինչ-որ բան փոխվել է դեպի վատը: Հույս դնել, որ միայն երիտասարդների՞ց է նորություն գալու, բայց երիտասարդ լինել նշանակում է անփորձ լինել, մեկ-մեկ անգամ անպատասխանատու լինել, դա պրոֆեսիոնալիզմի դեմ է՝ և՛ մշակույթի ոլորտում, և՛ քաղաքականության: Եվ ես այդ տենդենցն եմ տեսնում: Եթե նոր սերնդի հետ ես աշխատում, չի նշանակում, որ դա ավելի լավ է, քան այն սերնդի հետ աշխատելը, որը փորձ ունի: Եվ եթե այս սերնդից առաջ են աշխատել, չի նշանակում, որ անպայման կոռումպացված են եղել: Պետք է շարունակել աշխատել պրոֆեսիանլիզմով: Հարց է առաջանում՝ ինչպե՞ս «ջնջեցիք» այն մարդկանց, որոնք գիտեն աշխատել, երիտասարդներին ինչ-որ բան պետք է փոխանցել, որ իմանան՝ ինչպես աշխատել, օդից չի ընկնելու փորձը, փոխանցումը պետք է պրոֆեսիանալ ձևով կազմակերպել»:
«Ես չհասկացա, թե ինչու «Ոսկե ծիրան» փառատոնի բացմանը ներկա չէր Կրթության, գիտության, մշակույթի, սպորտի և երիտասարդության նախարարը»,-նշեց Ս. Ավետիքյանը՝ հավելելով, որ պարտադիր չէր ելույթ ունենալ, բայց պետք է ներկա լիներ:
«Արվեստը կրթության հարցում մեծ դեր ունի, բայց մշակույթը ավելի ազատ տարածք է, որը կարող է անգամ ի հակառակ լինել կրթության, պրովոկատոր լինել, որպեսզի ինչ-որ բաներ տեղից շարժվեն: Դա նշանակում է որոշ չափով ազատ լինել, ոչ թե վանդակի մեջ դրված,- նշեց Ս. Ավետիքյանը: – Ցուցամոլությունը շարունակվում է… Արվեստը գեղեցկությոնից ավելի բարձր է… Ավելի լավ է լինել համեստ, բայց խորքային, մակերեսային կոմունիկացիաները անցողիկ են»:
Ս. Ավետիքյանի խոսքով՝ Սփյուռքից հնչող հարցերը մնում են անպատասխան. «…Մեզ պակասում է գլոբալ մտածելակերպը»:
Մանրամասն՝ տեսանյութում: