Պետք է որևէ անցումային համակարգ առաջարկել Հրվ. Կովկասի երկրներին. այսօր «ՆԱՏՕ-Հարավային Կովկաս՝ ռազմավարական մոտեցումներ տարածաշրջանի անվտանգությանը» միջազգային կոնֆերանսի բացման խոսքում ասաց Հայաստանում Մեծ Բրիտանիայի դեսպան Քեթրին Լիչը:
Նա իր խոսքը սկսեց՝ ապօրինի որակելով Ղրիմի անեքսիան Ռուսաստանի կողմից: Ինչ վերաբերում է առաջիկա հնարավոր զարգացումներին, ապա ըստ նրա՝ շատ բան կախված է նրանից, թե ՌԴ-ն ինչպես կարձագանքի ԵԱՀԿ-ի, ԱՄՆ-ի, Ուկրաինայի գործողություններին, քանի որ հումանիտար իրավիճակը շատ արագ է զարգանում: Նա նշեց, որ Պուտինի ելույթի հետևանքները թողնում է ներկաներին:
«Երկարաժամկետ հեռանկարում արդյունքը կլինի կոնսոլիդացիան, տարածաշրջանային զարգացումը: Սակայն այս գործընթացը խոչընդոտվում է ձգձգված հակամարտությունների պատճառով: Մենք ուզում ենք Կովկասը տեսնել անվտանգ»,- ասաց նա:
Ինչ վերաբերում է հայ-թուրքական հարաբերություններին, ապա դեսպանն ասաց՝ ում է ձեռնտու սահմանների չբացումը: Նա նշեց նաև, որ մինչ տարածաշրջան-ՆԱՏՕ մերձեցումը՝ միջազգային հանրությունը պետք է անցումային ինչ-որ բան առաջարկի տարածաշրջանային երկրներին:
«ԵՄ-ն փորձում է հասկանալ, թե ինչ կարող է առաջարկել այդ երկրներին: Ես տպավորված եմ, թե ինչպես է ՀՀ-ն, լինելով ՀԱՊԿ անդամ, կառուցում իր հարաբերությունները ՆԱՏՕ-ի հետ»,- ասաց նա:
Լուսանկարը` PAN Photo-ի
