ՀՀ Ազգային ժողովի «Իմ քայլը» խմբակցության երկու պատգամավորներ՝ Բաբկեն Թունյանը և Վարազդատ Կարապետյանը աշխատավարձի նվազագույն շեմը բարձրացնելու առաջարկով էին հանդես եկել, որին կառավարությունը հավանություն է տվել․ ավելին՝ 63 հազարի փոխարեն նվազագույն աշխատավարձի շեմն առաջարկել է սահմանել 68 հազար դրամը։ Փորձագետների կողմից այս առաջարկը հիմնականում ողջունվում է, բայց, այնուամենայնիվ, նշում են, որ կան որոշակի մտահոգություններ։
«Ընդհանրապես, պետք է ասել, որ նվազագույն աշխատավարձի շեմի արդյունավետ և օբյեկտիվ սահմանումը խնդիր է ամբողջ աշխարհում տնտեսագետների համար։ Տարբեր երկրներ, այդ թվում նաև զարգացած երկրներ, շատ երկար մտածում են, վերլուծություններ են կատարում, թե նվազագույն աշխատավարձն ինչպիսին պետք է լինի, որպեսզի տնտեսական զարգացումը նպաստավոր լինի։ Սակայն մեր տնտեսության, մեր հասարակության դեպքում պետք է ասել, որ մենք մի փոքր կազուսային, հետաքրքիր իրավիճակում ենք։ Երկար տարիների ընթացքում մեր հասարակությունը և, մասնավորապես, տնտեսագիտական հանրույթը մեկնաբանում էր, որ իրականում մենք շատ լուրջ խնդիր ունենք, որովհետև մեր նվազագույն աշխատավարձը չի բավարարում, որպեսզի ծածկենք մեր նվազագույն սպառողական զամբյուղը։ Վերջին տվյալներով՝ 2019 թվականի առաջին եռամսյակի հաշվարկներով նվազագույն սպառողական զամբյուղը ընթացիկ գներով կազմել է 63500 դրամ։ Հետևաբար, այս առաջարկը գալիս է նրան, որ տարիներ շարունակ կուտակված խնդիրը՝ նվազագույն աշխատավարձը գոնե համապատասխանի նվազագույն սպառողական զամբյուղին, դառնա իրականություն»,- «Առաջին լրատվական»-ի հետ զրույցում ասաց Հայաստանի պետական տնտեսագիտական համալսարանի ռեկտորի պաշտոնակատար Ռուբեն Հայրապետյանը։
Ռուբեն Հայրապետյանը նաև հավելեց․ «Ես կարծում եմ՝ իհարկե, ցանկացած նմանատիպ փոփոխություն իր մեջ ռիսկեր պարունակում է։ Անգամ բյուջե ունենալն ինքնին ենթադրում է ռիսկեր։ Եթե կա բյուջե, ուրեմն կա բյուջեի կոռուպցիոն ռիսկեր, և դա չի նշանակում՝ եթե կա ռիսկ, ապա դու բյուջե չպետք է ունենաս, այլ պետք է հասկանաս, թե ինչպես ավելի արդյունավետ կառավարես այդ ռիսկերը։ Ես կարծում եմ՝ նվազագույն աշխատավարձի բարձրացումը ոչ միայն ողջունելի և դրական քայլ է, այլև վաղուց հասունացած անհրաժեշտություն էր։ Այլ հարց է, որ սրա հետևանքով առաջացած ռիսկերը կառավարությունը պետք է արդյունավետ մեխանիզմներով կառավարի»։
Մանրամասները՝ տեսանյութում։
