«Սա խուլիգանի երկիր է, ավազակների երկիր: Մարդկանց անմեղ տեղը բռնել են ու հիմա դանդաղ թունավորում են: Ալիկ Սարգսյանի հետ համատեղ՝ կազմակերպված թունավորում են տղայիս: Ամեն ինչ դիտավորյալ է արվում»,- այսօր «Առաջին լրատվական»-ի հետ զրույցում ասաց Բանդայի հայտնի գործով մեղադրյալ Արտուշ Հակոբյանի հայրը՝ Սուրիկ Հակոբյանը:
Նշենք, որ այսօր կայացած դատական նիստում վերջինիս պաշտպանը միջնորդություն է ներկայացրել փոխել Հակոբյանի խափանման միջոցը, քանի որ նա առողջական լուրջ խնդիրներ ունի, նրա կյանքին և առողջությանը վտանգ է սպառնում:
«Իմ պաշտպանյալի կյանքին ու առողջությանը վտանգ է սպառնում, ես միջնորդում եմ, որ Արտուշ Հակոբյանի խափանման միջոց կալանքը փոխվի, խափանման այլ միջոց ընտրվի, որպեսզի հնարավոր լինի բժշկական լիարժեք հետազոտություն կատարել»,- ասել է պաշտպան Հովիկ Արսենյանը:
Պաշտպանի միջնորդությունը, սակայն, չի քննարկվել, քանի որ դատական նիստը հետաձգվել է: Պաշտպանը նաև հայտարարել է, որ գործն անիմաստ հետաձգվում է, իսկ գործով ապացույցները կեղծվել են:
«Դիտավորյալ են անում, էսօր ուզում են էդ տղերքին վերացնել ու վերջ: Ոնց որ Արմանի հետ վարվեցին, էնպես էլ իմ տղայի հետ են վարվում: Մենակ պետք է տղայիս տեսնեք, ահավոր վիճակում է, դրանից հետո չեմ էլ կարողանում խոսել: Տղաս մի ամիս առաջ առողջ մարդ էր, հիմա՝ 1 ամսվա ընթացքում, 11 կիլո նիհարել է ու գույնը սևացել: Ես վստահ եմ, որ Ալիկ Սարգսյանն է թունավորում իմ տղային»:
Հիշեցնենք, որ ամիսներ առաջ էլ «Դատապարտյալների հիվանդանոց» քրեակատարողական հիմնարկում մահացավ այս նույն գործով ամբաստանյալ Արման Դալլաքյանը: «Էդպես հերթով ուզում են վերացնել տղաներին: Ես վստահ եմ դրանում»,- ասաց Սուրիկ Հակոբյանը՝ ավելացնելով, որ ինքը հույս չունի, թե իրավապահ մարմինները հետևողական կլինեն, որպեսզի այս գործով ապօրինությունը կանխվի:
«Ով ա լսում մեզ, հասարակական, պաշտոն չունեցող մարդուն ով ա լսում էս երկրում: Եթե դեպուտատ չես, քեզ չեն լսի: Սա բեսպրեդելի երկիր է, օրենք չկա»:
